Tonakgolo Ramathuba o nyaka mathata ao a paledišago projeke ya Morebeng a rarollwa nakong ya beke tše nne

Ka Mogale Mohale

Badudi bao ba befetšwego ba re ba nyaka sekontiri sa bona se fetšwa.

Se ke ka morago ga gore Tonakgolo Ngk Phophi Ramathuba a etele sekontiri seo se palago go fela sa D15, D3150 le D3232 go tšwa Morebeng go ya Sekgosese Wholesale ka ntle ga Polokwane, Limpopo ka Laboraro, 9 Mosegamanye.

Se se tla ka morago ga gore projeke ya dimillione yeo e thomilwego ka 2017 mme e letetšwe go fela ka kgwedi ya Phato 2022 e be le mathata, kudu mabakeng a go fetša maporogo.

Le ge e le gore Presidente Cyril Ramaphosa o ile a netefatšwa ka kgwedi ya Moranang 2022 go re e tla fetšwa, tšwelopele ga e gona.

Badudiba boditše Tonakgolo Ramathuba gore projeke ye e amile maphelo a bona bošaedi mengwa ye seswai.

“Go ba boima go sepela tseleng ye ka nako ya dipula. Ekonomi ya motse wa rena e ya fokola ka gore tsela ga e sepelege. Motho o tšeya iri tše pedi go leeto leo le tšeyago metsotso ye 30,” gwa realo Simon Mojela.

Ba ipeletša gore bao ba amegago go palediša projeke ye go fela gore ba rwešwe maikarabelo, mme projeke ye e fetšwe ntle le go senya nako.

Tonakgolo Ramathuba o ile a gatelela gore o ile go palelwa ke go lebagana le Presidente Ramaphosa ge go sena tšwelopele projekeng ye.

“Ke ka lebaka leo ke gorogilego projekeng ye go kwišiša mabaka ao a hlodilego gore projeke ye e tsielwe. Nepo ke gore e fetšwe ka ponyo ya leihlo,” a realo.

O re o nyaka bao ba amegago gore ba rarolle mathata ka moka ao a paledišago projeke ye go fela nakong ya beke tše nne.

“Go swanetšwe go kgethwe rakontraka wa go tshepagala wa go tseba mošomo, kudu wa go kwišiša go aga. Meago ya setšhaba ga se ya go dira tšhelete, eupša go aba ditirelo,” gwa realo Ramathuba.