Leina la Floyd Shivambu ga le lenaneong la maloko a maswa a mokgatlo wa MK ao a yago Palamenteng
Mokgatlo wa uMkhonto weSizwe o lokollotše lenaneo la wona la maloko a maswa a Palamente ao a tlago go ikana bekeng ye e tlago.
Le ge go le bjalo, leina la mongwaledi pharephare wa peleng wa mokgatlo Floyd Shivambu ga le lenaneong le ge mokgahlo o kile wa bolela gore o tla leba Palamenteng.
Shivambu o sa tšwa go rakwa ka bjalo ka mongwaledi pharephare wa mokgatlo ka morago ga gore a etele moruti yo a tšhabilego ka mo nageng Shepherd Bushiri ka Malawi.
Maina a senyane a lenaneong ke: Khanyisile Litchfield-Tshabalala., Jefrey Mtolo, Zibuse Cele, Philisande Mkhize, Siphetho Mkhize, Kaiser Motaung, Noma Buthelezi, Ntandoyenkosi Shezi le Lungisani Shangase.
Maloko a maswa a palamente a mokgatlo wa MK a beakantšwe go ikana ka Laboraro.
Go sa le bjalo ka Labone, Shivambu o tsebišitše gore ditherišano tša go hloma mokgatlo wo moswa wa dipolotiki di a tšwela pele. Se o se tsebišitše le ge a re o latofatšwa ka gore o lekile go tloša mopresidente wa peleng Jacob Zuma setulong bjalo ka moetapele wa uMkhonto weSizwe.
“Re tla be re nyaka bohlale bja maAfrika Borwa a tlwaelegilego, go akaretšwa dikereke ka moka — Kereke ya Bokriste ya Sione, Kereke ya Nazareth Baptist, le IPCC. Re tla be re rerišana gape le batho ba go swana le Michael Nkuna, Ngaka Irvin Khoza, Patrice Motsepe, le Kaizer Motaung ka ga tlhokego ya go hloma mokgatlo wo mofsa wa dipolotiki.”
Shivambu o boletše le gore, a ka se tsoge a rola modiro go MK Party
