Tonakgolo Ngk Phophi Ramathuba o hlahlobile kago ya bookelo bja Polokwane Academic

Tonakgolo ya Limpopo, Ngk Phophi Ramathuba o etetše lefelo la kago ya bookelo bja Polokwane Academic ka Labone, 25 Lewedi go hlahloba kgolo ya projeke ye maatla ya dimillione yeo e tlago go matlafatša phihlelelo ya ditirelo tša maphelo tša maemo a godimo profense ka bophara.

Kago ya bookelo bjo e thomile ka 2023 ka mašeleng ao a fetago R800 millione gomme e hlotše mešomo ye e fetago 1 000. Bookelo bo beakantšwe go fetšwa ka 2028.

Tonakgolo Ramathuba o be a farafarilwe ke meyara wa masepala wa selete sa Capricorn, Mamedupi Teffo, le maloko a gagwe a lekgotla go hlahloba mešomo ya kago le go boledišana le batšeya karolo ka lebelo le boleng bja phetho ya ditirelo.

Ramathuba o amogetše boikgafo bja mmušo go tiiša motheo wa tša maphelo, mme a re bookelo bjo bo ile go tšwela badudi mohola ka tša maphelo.

“Ketelo ye e mphile sebaka sa go bapetša tše di begilwego mo dithulaganyong tša rena le seo se diragalago mo lefelong le. Se se tla re thuša go tsenelela ka pela ge go na le mathata,” a realo.

Ba bangwe bao ba bego ba le gona ke Molekgotlaphethiši wa kgoro ya Mešomo ya Setšhaba, Ditsela le Mafarahlahla, Ernest Rachoene le Molekgotlaphethiši wa Maphelo, Dieketseng Mashego gammogo le moemedi wa masepala wa Polokwane, Joosuf Pemma.