Limpopo e itemogela lehu la mathomo la leagolwa

Ka Mogale Mohale

Lesogana la mengwaga ye 19, Raymond Sekele o hlokofetše komeng.

 

O be a le komeng motseng wa Dennilton Uitspanning B (Magakadimeng), seleteng sa Sekhukhune efela a hlokofala bookelong bja Philadelphia ka Sontaga, 6 Mosegamanye ka morago ga go hlakahlakana.

 

Go ya ka dipego tšeo dinetefaditšwego ke mohlokomedi wa gagwe, Sekele o be a na le mathata a go wa mme a hwetša dihlare go laola seemo sa gagwe.

 

O ile a wa ka Laboraro, 2 Mosegamanye eupša a kgona go kaonafala a tšwela pele ka merero ya koma ntle le mathata.

 

Ngaka ya sekgowa yeo e filwego maikarabelo a koma ye le ba lapa ba ile ba botšwa ka tiragalo ye. Koma e ile ya eletšwa go iša Sekele bookelong gore a hwetše thušo.

 

O ile a amogelwa bookelong bja Philadelhpia gore a hwetše thušo ya tšhoganetšo, efela mohlokomedi wa gagwe le ba lapa ba ile ba hwetša mogala gore o hlokofetše.

 

Molekgotlaphethiši wa kgoro ya Pušo Tirišano, Bodulo bja Batho le Merero ya Setšo, Basikopo Makamu o re ba nyamišitšwe ke lehu le.

 

O re o hweditše pego ya gore leagola le paletšwe ke go tsoga le ba bangwe ka Sontaga.

“Efela se se be se sa makatše ka ge a be a tsebega ka go robala nako ye telele go feta ba bangwe,” a realo.

 

Makamu o re mohlokomedi o ile a mo hlola ka iri ya seswai mesong mme a hwetša a sa fetole ebile a sa gogi moya gabotse.

 

“Re nyamišitšwe ke lehu le. Re šomišana le ba kgoro ya Maphelo, Thuto, Maphodisa gammogo le National Prosecuting Authority go netefatša gore ga gona motho yo a lahlegelwago ke bophelo bja gagwe,” a realo.

 

O re lehu le ke kgonthišišo ya gore ba hloka go šoma ka thata go netefatša gore ba efoga mahu dikomeng. “Re iša mantšu a hlobošo go ba lapa nakong ye ya boima,”a realo.

 

O re ba lapa ba kgonthišišitše gore Sekele o be a na le mathata a go wa mme o be a šomiša dihlare nakong ya ge a tla ya komeng.