Dithunya tše tharo tšeo di thopilwego go borakgwebo Vusimuzi ‘Cat’ Matlala le Katiso ‘KT’ Molefe di amana gabotse le dipolao tše 18

Sethunya sa tlhaselo sa AK-47 le dithunya tše dingwe tše pedi tšeo di thopilwego mabapi le melato ya borakgwebo bao ba tsošago ngangišano Vusimuzi ‘Cat’ Matlala le Katiso ‘KT’ Molefe di kgokagantšwe gabotse le melato ye 18 ya polao le maitekelo a polao le bosenyi bjo bongwe bjo bogolo.

Mmoleledi wa Maphodisa a Setšhaba Colonel Athlenda Mathe o utolotše gore gare ga dikgokagano tšeo di tiišeditšwego ke maitekelo a dipolao tša Joe Sibanyoni, Don D’Ingeni, di-DJ Sumbody, Vinto, le Vettis.

 “Dithunya tše tharo tšeo di lego ka tlase ga tlhokomelo ya rena bjale di kgokagane gabotse le melato ye 18,” Mathe o boletše. 

O okeditše ka gore maphodisa a sa nyaka AK-47 ye nngwe yeo e kgokaganego le molato wa Tebogo Thobejane.  Balaodi ga se ba lahla kgonagalo ya go kgokaganya dithunya le bosenyi bja tlaleletšo.

Matlala o tšweletše kgorong ya tsheko ya bomaseterata ya Alexandra lehono moo a ganeditšwego ka peile.  Kgoro e ile ya hwetša gore o paletšwe ke go hlatsela gore a ka seje fase ge a ka lokollwa.