Vincent Kunutu o hlokofetše

Setšhaba sa Seshego se nyamile morago ga pego ya lehu la tatago setšhaba ebile e le moetapele wa mafolofolo, Vincent Kunutu yo e bego e le modulasetulo wa Seshego Community Against Crime and Gangsterism (SCACAG).

Ditaba tša lehu la gagwe di netefaditšwe ke mošomimmogo ka yena ebile e le mogwera wa gagwe, Slight Mabotja ka Mokibelo, 9 Phato yo a boletšego gore lehu la gagwe ke tahlegelo e kgolo go mokgatlo le go setšhaba ka kakaretšo.

“Ke ka bohloko bjo bogolo go tsebiša ka lehu la Vincent Kunutu. E be e le moetapele wa setšhaba sa Seshego gape e le modulasetulo wa SCACAG. A re feng ba lapa sebaka sa go lla le go rulaganya. A moya wa gagwe wa go lwela setšhaba o robale ka khutšo,” a tsebiša bjalo Mabotja.

Kunutu o be a hlomphwa kudu Seshego, Moletjie le Polokwane ka lebaka la boneelo bja gagwe go kaonafatša bophelo bja setšhaba. Mo mengwageng ye e fetilego, o be a le pele ga ditlhopha tša dipelaelo tša ditirelo tša setšhaba, twantšho ya diritibatši, mananeo a go lwantšha dihlopha tša digongwana dikolong le maiteko a go kaonafatša maphelo a batho.

Ka fase ga boetapele bja gagwe, SCACAG e bile lentšu le maatla go lwantšha dihlopha tša digongwana, diritifatši le bohodu, gantši a šoma mmogo le maphodisa go bušetša khutšo le tšhireletšo motseng.

Baagi ba re Kunutu o be a sa tšhabe go lebagana le mahodu le bašomi ba mmušo go šireletša toka, mme ba mo hlaloša e le lentšu go bao ba hlokago lentšu. O be a dula a bea dinyakwa tša batho pele ga tša gagwe, le ge bophelo bja gagwe bo ka tsena kotsing.

Lehu la gagwe le hlalositšwe bjalo ka “tahlegelo e kgolo” go ntwa ya go lwantšha bosenyi tikologong, gomme mediro ya go mo gopola e tšwela pele go tšwa go baagi, bašomi ba setšhaba le mekgatlo ya boitekanelo.

Tshedimošo ka letšatši la tirelo ya segopotšo gammogo le tirelo ya poloko di tla tsebišwa mo nakong yeo e sa fedišego pelo, eupša dipego di re a ka bolokwa ka letšatši la gagwe la matswalo ka Mokibelo, 16 Phato.