Kgorotsheko e ahlotše gore go thwalwa ga Hlophe ka JSC ga go dumelelane le molaotheo

Kgorokgolo ya tsheko ya Kapa Bodikela e ahlotše gore sephetho sa Palamente sa go thwala moahlodi John Hlophe yo a tlošitšwego setulong go Khomišene ya Tirelo ya Boahlodi (JSC) a se dumelelane le molaotheo.

Kahlolo ye e latela kgopelo ya kgorotsheko yeo e tlišitšwego ke Freedom Under Law, Corruption Watch, le DA, bao ba boletšego gore go thwala ga Hlophe go JSC go bea boipušo bja boahlodi kotsing.

Kgorotsheko e boletše gore Seboka sa Maloko a Palamente se paletšwe ke go šomiša temogo ya sona gabotse, ka go realo ya bea potego ya boahlodi kotsing.

“Go thwala moahlodi yo a tlošitšwego setulong go JSC go nyenyefatša sona sehlongwa seo se gafetšwego go thekga botshepegi bja boahlodi le boikarabelo”.

Kahlolo e be e balega ka gore: “Seboka sa Setšhaba ga se sa ka sa ela hloko taba e swanetšego ya gore Dr. Hlophe o ile a kgaolwa setulong ka baka la boitshwaro bjo bo gobogilego kudu.

Kgorotsheko e ile ya bolela gore sephetho sa NA ga se dumelelane le molaotheo ebile ga se na mohola, ya sekasekwa, gomme ya se beela ka thoko.Ka polelo ka morago ga kahlolo, uMkhonto weSizwe Party e boletše gore ba gana kahlolo yeo.

“Sephetho sa go kgetha Dr. Hlophe, bjalo ka leloko la JSC, e bile ka baemedi bao ba kgethilwego ka tshwanelo ka Sebokeng sa Maloko a Palamente go ya ka maatla le ditokelo tša Palamente, tšeo di tšerwego go tšwa molaotheong. Ka fao, sephetho sa Kgorokgolo ya Tsheko ya Kapa Bodikela ke go kwera toka ebile ga se dumelelane le molaotheo ka mo go feletšego,” mmoleledi Nhlamulo Ndlela o boletše.