Tšhelete ya go lekana R730 millione yeo e utswitšwego pankeng ya VBS e bošitšwe morago

Ka Mogale Mohale

Tšhelete ya go lekana R730 millione yeo e utswitšwego pankeng ya VBS e kgonne go bušwa morago.

Se ke go ya ka pego ya Prudential Authority (PA) ya Panka ya Resefe ya Afrika Borwa.

Go ya ka mofediši wa VBS Anoosh Rooplal, o re se ke boraro bja R2.3 billione yeo e rafilwego pankeng ye ka tsela ya bomenetša le bohodu. Se keka morago ga gore dimasepala gammogo le batšofe ba beeletše tšhelete tša bona pankeng ye.

Pego ya Advocate Terry Motau ya matlakala a 148 ya go bitšwa: “VBS Mutual Bank: The Great Bank Heist,” yeo e lokolotšwego ka kgwedi ya Diphalane 2018 ke yona e utollotšego bohodu pankeng ye.

Pego yeo e dirile gore melato ye 29 e bulwe, batho ba golegwe mme ga bjale melaoto ye senyane e pele ga kgoro ya tsheko.

Panka ye e ile ya tswalelwa ka kgwedi ya Dibatsela 2018. Roopplal o re maetekelo a go koleka tšelete yeo e adimilwego a tšwela pele mme go na le tšwelopele ye go makatša go fihla ga bjale.

Ga bjale Rooplal o kgonne go lefa bao ba kolotwago go tloga nako yeo ba tšerego mathata a panka ye. “Ka 2022 bao ba kolotwago ba hweditše tšhelete ya go lekana R159 millione mme ka Manthole 2024, R458 millione e lefilwe,” a realo.

Bao ba beeleditšego tšhelete tša bona mme tša timelela ge panka ye e fedišwa ba re ba na le kholofelo ya gore ba tla hwetša tšhelete tša bona morago ge ba bona tšwelopele yeo e dirwago ke Rooplal.