Mong wa lefelo la rehabilitation centre o swerwe ka baka la polao

Mong wa lefelo la rehabilitation centre wa mengwaga ye 30 o golegilwe ka lebaka la polao ya monna wa mengwaga ye masomepedi senyane.

Mmolelledi wa maphodisa a Limpopo Colonel Malesela Ledwaba ore mogononelwa o ile a lata motšwasehlabelo ga gabo Ga-Sekgopo ka la 2 Phupu 2025, mme a mo tlisa lefelong leo le thušago bao e lego makgoba a diokobatši ka Modjadjiskloof.

 “Go thwe motšwasehlabelo

 o ile a hlaselwa gomme ka morago a tswalelwa ka phapošing yeo e lego lekatana. Go ya ka dipego, motšwasehlabelo o be a na le bothata bja go sepela gomme a palelwa ke go hlapa go fihlela a bušetšwa lelapeng la gabo ka motseng wa Ga-Sekgopo ka la 10 Phupu 2025,” Ledwaba o boletše.

Motšwasehlabelo o ile a išwa sepetlele sa Mankweng gomme a amogelwa a le boemong bjo bo hlobaetšago.  O ile a hlokafala ka morago ga go amogelwa sepetlele , gomme dinyakišišo ya ngwadišwa Seteišeneng sa Maphodisa sa Mankweng.

Go ya ka Ledwaba, go dirilwe nyakišišo ya setopo ya forensiki, gomme ngaka ya malwetši e tiišeditše gore mohu o hweditše dikgobalo tše šoro.   “Faele ya dinyakišišo e ile ya fetošwa go ba polao, gomme go tsoma batho go ile gwa thongwa gateetee ke maloko a Sehlopha sa go Bea leihlo sa Mopani le maphodisa a Modjadjiskloof go swara mogononelwa. Mogononelwa o ile a swarwa letšatši ka morago seleteng sa maphodisa ka Labobedi, la 22 Phupu 2025, gomme a latofatša ka polao,” a tlaleletša.

 Mogononelwa o letetšwe go tšwelela kgorong ya tsheko ka molato wa polao Kgorong ya Tsheko ya Selete ya Modjadjiskloof ka Labone, July 24, 2025.

Dinyakišišo tša maphodisa di a tšwela pele.