Diprokeke tša ditsela tše 22 tša Limpopo di tla thongwa go kaonafatša polokego ditseleng

Mošomo o tlo thoma go ditsela tše 22 tša Limpopo bjalo ka karolo ya lenaneo la tlhokomelo ya thibelo go boloka meago ya mmušo ya profense.

Lenaneo le ke karolo ya pele ya diprojeke tše 69 tša ditsela tšeo di rulagantšwego ngwaga wa ditšhelete wa 2025/26 ke Roads Agency Limpopo.

Le akaretša ditsela tše bohlokwa tša go swana le D4 go tloga N1 go ya Elim, R522 go tloga Makhado go ya Vivo, D1294 go tloga Riba Cross go ya Steelpoort, D844 go tloga Mankweng go ya Sebayeng, le D4250 go tloga Apel go ya Malope go ya Mogalatsane.

Molekgotlaphethiši wa Kgoro ya Mešomo ya Setšhaba, Ditsela le Mafarahlahla, Ernest Rachoene o re lenaneo le le tla kaonafatša polokego ya ditsela, la fokotša tšhomišo ye ntši ya tšhelete, gape la thekga ekonomi ya metse magae le hlolego ya mešomo.

“Se ke kgato ye bohlokwa ya go phethagatša maikarabelo a rena a go hlokomela le go oketša bophelo bja ditsela tša Limpopo,” a realo Rachoene.

“Ga se fela go bušetša ditsela bophelong, eupša gape ke go tsenya tshepo ditšhabeng tšeo di bego di duma tšwelopele ye e bonagalago,”

Ditšhaba di kgopelwa go šomišana le dihlopha tša kago mme baotledi ba eletšwa go ba le pelo telele ge mošomo o sa le gare.

“Ditsela tše dingwe tšeo di šetšego di tsebišitšwe ka fase ga lenaneo le di tla šongwa ka dikarolo go kaonafatša kgokagano profense ka bophara,” gwa realo Rachoene.