Barutwana ba 33 sekolong sa godimo sa Mahuntsi ba kitimišeditšwe bookelong ka morago ga go bontšha dika tša mpholo wa ka dijong

Barutwana ba 33 sekolong sa godimo sa Mahuntsi kua Malamulele ba kitimišeditšwe bookelong ka Labobedi, 2 Lewedi ka morago ga go bontšha dika tša mpholo wa ka dijong.

Go ya ka Kgoro ya Thuto ka Limpopo, barutwana bao ba ile ba thoma go hlatša le go kwa bohloko ka morago ga go ja dijo tšeo di rekilwego go barekiši ba ka ntle ga sekolo.

Morutwana o tee o ile a hwetša kalafo mme a fola ka pela, a lokollwa ka letšatši leo mola baithuti ba 32 ba ile ba robala bookelong go hlokomelwa ka botlalo.

Mmoleledi wa kgoro, Mosebjane Kgaffe o re go rekiša kgauswi le sekolo go emišitšwe ka ge dinyakišišo di kgatlampana go hwetša seo se hlotšego tiragalo ye.

“Baokamedi ba lenaneo la bosetšhaba la dijo tša sekolo ba šetše ba le sekolong go lekola polokelo ya dijo le dilwana tšeo di šomišwago tša go apea go hlahloba gore bothata bo tšwile kae,” a realo.

Kgaffe o re bophelo le tšhireletšo ya barutwana di dula e le ntho ye bohlokwa, gomme malapa a barutwana bao ba amegilego a šetše a tsebešitšwe go netefatša gore bana ba bona ba hwetša hlokomelo ya maleba.