Mošemane (6) o bolailwe ke kolo yeo e arogilego

Mošemane wa Mengwaga ye 6 o bolailwe ka morago ga go bethwa ke kolo ye e arogilego.

Tiragalo ye ya bohloko e diregile ka Labohlano, 18 Mosegamany lefelong la Juju Valley , Seshego, ka ntle ga Polokwane mo Limpopo.

Go ya ka dipego, mošemane o be a bapala le bana ba bangwe mola mmagwe a dutše kgauswi a ba lebeletše. Ka pejana, mošemane o ile a wela fase ka tshoganetso.

Ge ba mo lebelela, ba lemoga gore o be a etšwa madi hlogong. Mmagwe o ile a kgopela thušo setšhabeng, gomme ba mo iša bookelong bja kgauswi.

Baabi ba tša maphelo ba dirile X-ray gomme ba hwetša gore go na le kolo yeo e tsenego hlogong ya ya mošemane yo, ka godimo ga tsebe ya ka letsogong la nngele.

Go ile gwa dirwa dithulaganyo tša gore a išwe Polokwane go hwetša kalafo ye oketšegilego, efela ka bomadimabe, ngwana o ile a hlokofala pele a ka išwa.

Mmoleledi wa maphodisa wa Limpopo, Colonel Malesela Ledwaba, o re dinyakišišo tša mathomo di bontšha gore mošemane o thuntšhitšwe ke kolo yeo e arogilego. Le ge go le bjalo, ga go na modudi yo a begilego gore o kwele sethunya se thuntšwa nakong yeo tiragalo e diregilego ka yona.

“Seo se hlotšego tiragalo ye se ya nyakišišwa, gomme molato wa polao e butšwe setišing sa maphodisa sa Seshego,” a realo.

Ledwaba o tšwetše pele ka go kgopela mang le mang yo a nago le tshedimošo ye e ka thušago ka dinyakišišo go ikopanya le Sergeant Thabo Oliphant mo nomorong ya 076 1728 719, goba go ya setišing sa maphdisa a kgauswi.

Mokhomišinare wa mapodisa a Limpopo Lieutenant-General Thembi Hadebe o kgopetše setšhaba gore se thuše ka dinyakišišo.

“Go hlokofala ga ngwana yo monnyane ka maemo a go tlaiša a go se kwagale ke selo se bohloko kudu. Re kgopela mang le mang yo a bonego se sengwe sa go se tlwaelege goba sa go belaetša letšatšing leo la tiragalo go tšwelela,,” a realo.