Thabang Shiang o swerwe ditatofatšong tša go utswa, go senya le go fiša kantoro tša setiši sa maphodisa a Polokwane

Thabang Shiang (31) o tšweletše pele ga Kgorotsheko ya Polokwane ka Laboraro, 27 Phato a lebane le ditatofatšo tša go fiša, go utswa le go swarwa ka dithoto tše di utswitšwego.

Molato wa gagwe o šotišeditšwe go Laboraro, 3 Lewedi gore a dire kgopelo ya beile. Go ya ka pego ya maphodisa, tiragalo ye e diregile ka Labobedi mesong, 26 Phato ge a fihla setišing sa maphodisa a Polokwane gomme a kgopela go šomiša ntlo ya boithomelo.

Maphodisa ao a bego a le mošomong a ile a mo bontšha ntlo ya boithomelo, eupša ba thoma go belaela ge a sa boye ka pela.

Ba ile go mo hlola mme ba mo hwetša a le lebating la manamelo a maemo a godimo a swere mokotla. Mmoleledi wa maphodisa a Limpopo, Colonel Malesela Ledwaba o re ge ba mo lekola, ba hweditše dithoto tše mmalwa tša maphodisa, go akaretša le sebaledi.

“Dinyakišišo tša pele di utolotše gore mafelo a mmalwa a kantoro a robilwe, a senywa ebile a fišwa, gomme gwa senyega dithoto tše dintši,” a realo.

Ledwaba o re dithoto tše di hweditšwego di akaretša sebaledi, mokotla wa sebaledi, seaparo sa maphodisa, thapo le tšedingwe.

“Shiang o ile a swarwa. Maphodisa ba sa dira dinyakišišo go lekola seo se hlotšego mollo le boleng bja dithoto tšeo di senyegilego,” a realo.

Mokhomišinare wa maphodisa a profense, Lieutenant General Thembi Hadebe o kgadile ka bogale tiragalo ye gomme a kgala bao ba dirago bosenyi kgahlanong le thoto ya mmušo gore ba tlo swarwa.

“Bao bao ba naganago gore ba ka nyatša maphodisa ka go senya mafelo a mmušo goba ka go utswa, ba tla lebgana le maatla ka moka a molao,” Hadebe a realo.