Masogana le banna ba bollotšwe mafelong a maphelo go ralala le Limpopo

Ka Mogale Mohale

Masogana le banna ba go feta 7 000 ba bollotšwe mafelong a maphelo go ralala le profense ya Limpopo.

Se ke ka morago ga gore Molekgotlaphethiši wa kgoro ya Maphelo, Dieketseng Mashego a thakgole lenanego la go bolla masogana le banna mafelong a maphelo ka Labohlano, 20 Phupu.

Go thoma ka tšatši leo go fihla ga bjale, palo ya batho bao ba bollotšwego e fihla 7 000. Ga re go palo ye, 700 ya bona ke ba mengwagaya go thoma ka 15 go ya godimo.

Mafelo a go feta 100 a go bolla a ralala le dilete ka moka tša profense mme batho ba hlohleletšwa go tšwela pele go ingwadiša.

Nepo ya lenanego le la profense ke go hlohleletša thibelo ya pheteletšo ya twatši ya HIV gammogo le go godiša maphelo a banna.

Dipalo di laetša gore selete sa Vhembe se di gogela pele ka batho ba 1 608 bao ba bollotšwego, gwa latela Waterberg ka palo ya 1 220. Palo ya Mopani le Sekhukhune e ka godimo ga 1 000 mme ya Capricorn e ka fase ga 1 000.

Mafelo ao a šomago kudu ke a sepetlela sa Dilokong, Tshilidzini le Thabaleshoba Community Health Centre.

Molekgotlaphethiši Mashego o re o thabišwa ke tshepedišo ya lenanego le. “Re thabela tšwelopele yeo e le go gona go fihla ga bjale. Palo ya banna bao ba tšwelelago go bollwa e laetša kgolo ya tsebo le go amogela ga meputso ya maphelo yeo e sepedišanago le lenanego le,” a realo.

O re o hlohleletša bahoi bao ba ratago go tšeya karolo lenanegong le go batamela mafelo a maphelo kgauswi le bona.

“Re tiiša polelo ya gore go bollwa ga rena ke mahala mme go dirwa ke bašomi bao ba hlahlilwego. Lenanego le le buletše bana ba mengwaga ya go thoma ka lesome,” a realo.