Democratic Alliance e nyaka go dirwa dinyakišišo tše di tseneletšego kotsing yeo e gobaditšego barutwana ba sekolo sa bagolofadi
Mokgatlo wa Democratic Alliance (DA) ka Limpopo e ipiletša gore go dirwe dinyakišišo ka kotsi ya senamelwa seo se bego se rwele barutwana tseleng ya R71.
Se se latela morago ga ge senamelwa seo se bego se nameditše batho ba 39, go akaretšwa barutwana ba 30 ba go tšwa sekolong sa go ikgetha sa Siloe School for the Blind go la Ga-Chuene ka ntle ga Polokwane se ile sa lahlegelwa ke taolo sa menoga mme gwa ba le dikgobalo ka Labone, 21 Phato.
Palo ya batho ba 35 ba hweditše dikgobalo tša go fapana. Mmoleledi wa Kgoro ya Dinamelwa le Tšhireletšego ya Setšhaba, Tidimalo Chuene o re batho ba babedi bahweditše dikgobalo tša magareng gomme ba išitšwe bookelong bja Tzaneen Medicare.
O re batho ba bangwe ba bararo ba bagolo ba hweditše dikgobalo tše nnyane gomme ba išitšwe bookelong bja Van Velden le Letaba.
“Bana ba babedi ba hweditše dikgobalo tša magareng mme ba išitšwe bookelong bja Van Velden le Letaba, mola ba bangwe ba 28 ba hweditše dikgobalo tše nnyane, ba išwa maokelong ao a mabedi,” gwa realo Chuene.
Mmoleledi wa thuto wa DA Limpopo, Jacques Smalle o re ba kgopela gore Molekgotlaphethiši wa Thuto, Mavhungu Lerule-Ramakhanya le mošomimmogo wa gagwe wa Kgoro ya Dinamelwa le Tšhireletšo ya Setšhaba, Violet Mathye ba etiše pele dinyakišišo tša kotsi ye.
“Re šetše re ile ra gatelela hlokego ya go kaonafatša maemo a ditsela tše bjalo ka George’s Valley, yeo e ka abelago dinamelwa tše boima tsela ye nngwe ye e šireletšegilego go fapana le R71,” a realo.
Smalle o re ba kgopela dinyakišišo tša go tsenelela gore go hwetšwe seo se hlotšego kotsi ye. “Se ke go netefatša gore go ba le hlokomelo ye kgolo tabeng ya go bonagala ga maphodisa ditseleng, maano a ditsela tše di šireletšegilego le kaonafatšo gammogo le šireletšego ya dinamelwa ka moka tšeo di šomišwago go sepediša barutwana,” a realo.
