Lephodisa leo le thutšego le go bolaya ngwana ka koloi ya mmušo le golegilwe

Lephodisa la mengwaga ye 36 le golegilwe ka molato wa polao le go otlela a tagilwe morago ga gore go thwe o thutše le go bolaya mošemane wa mengwaga ye seswai ge a be a otlela sefatanaga sa mmušo.

Tiragalo ye e diregile ka Labohlano mantšiboa, 8 Phato 2025, motseng wa Mogaung, ka Seleteng sa Sekhukhune.  

Mmoleledi wa maphodisa a Limpopo Colonel Malesela Ledwaba o re lephodisa, leo le šomago Seteišeneng sa Maphodisa sa Motetema le be le otlela a lebile Motetema ge a thula ngwana.  Mošemane o ile a hlokofalela lefelong la tiragalo.

Ledwaba ore dinyakišišo tša pele di laetša gore lephodisa le le be le le ka fase ga khuetšo ya bjala ge tiragalo ye e diragala.

Bolaodi bjo bo Ikemego bja Dinyakišišo tša Maphodisa (IPID) bo nyakišiša taba ye.

Mohlankedi yo o tšweletše kgorong ya tsheko ya Mmaseterata ya Nebo ka Mošupologo, 11 Phato 2025. 

Mokhomišenare wa Maphodisa wa Limpopo Molefotenente-Pharephare Thembi Hadebe o ile a sola boitshwaro bjo, a gatelela gore maloko a SAPS a swanetše go thekga Molao wa Boitshwaro wa tirelo ye ka dinako tšohle.