Mahodu a tšwela pele go hlasela dikolo a utswa didirišwa tša thekenolotši

Ka Mogale Mohale

Mahodu a tšwela pele go hlasela dikolo ka profenseng ya Limpopo.

Se se tla ka morago ga gore mahodu a hlasele kantoro ya taolo sekolong sa godimo sa Doasho ka Labone, 10 Mosegamanye Ga-Mamabolo ka ntle ga Polokwane.

Ba kgonne go tsena kantorong tšeo ka go thuba leboto mme ba bula lešoba ba kgona go utswa tablets tše 29 gammogo le laptop tše nne.

Tiragalo ye e ile go šaletša barutwana morago dithutong tša bona ge dikolo di bulwa.

Tiragalo ye e tlogetše Molekgotlaphethiši wa Thuto, Mavhungu Lerule-Ramakhanya a tshwenyegile ka ditiragalo tša bohodu tšeo di diregago dikolong.

O kgadile ka bogale tiragalo ye ka ge e šitiša dithuto. “Ke tshwentše ke tiragalo ye le mekgwa ya go hlasela tokelo ya barutwana ya go hwetša thuto ya maleba ka go ba utswetša didirišwa tša theknolotši,” a realo.

O re kgoro e ikemišeditše go netefatša gore lefelo la go ithuta e ba leo le bolokegilego go barutwana le barutiši mme ba ile go šoma le ba molao go kgonthišiša gore bao ba amegago ba lebagana le molao.

“Ke ipeletša go batswadi le setšhaba go tšeya maikarabelo a go šireletša le go bega ditiro tšeo di amegago le bohodu.

“Bohodu dikolong ga se bo amogelege mme bo ka se kgotlelege,” gwaealo Lerule-Ramakhanya.