Mogononelwa o swerwe molatong wa go thopša ga sefatanaga le polao ka morago ga mengwaga ye tshela

Maphodisa a swere monna wa mengwaga ye 45 molatong wa go thopša ga sefatanaga le polao, melato yeo e diragaletšego ka 2019 motseng wa Makumeke Mxadzi Ville, ka ntle ga Malamulele.

Monna yo o golegilwe ka Laboraro, 27 Phato lefelong la mabenkele a Nkowankowa Complex ka morago ga tshedimošo yeo e filwego maphodisa a Giyani.

Ka di 15 Phato 2019, maphodisa a ile a araba molato wa polao go la Makumeke Mxadzi Ville, moo ba hweditšego Matimu Chauke (31), yo e le go morutiši sekolong sa godimo a bolailwego ka go thuntšhwa.

Mmoleledi wa maphodisa a Limpopo, Colonel Malesela Ledwaba o re molato wa go thopša ga sefatanaga le polao e ile ya bulwa gore go dirwe dinyakišišo.

“Ka morago ga tiragalo yeo, sefatanaga sa motšwasehlabelo sa VW Polo se ile sa hwetšwa se lahlilwe lefelong la maphodisa a Vuwani ka thušo ya khamphane ya go šetša difatanaga,” a realo. O re dinyakišišo tša maphodisa tiragalong ye di tšwela pele.

Mokhomišinare wa maphodisa a profense, Lieutenant General Thembi Hadebe o amogetše go swarwa ga mogononelwa yo.

“Go swarwa ga mogononelwa ke segopotšo sa gore le ge go ka tšeya nako, lebele la toka le tla go hwetša,” gwa realo Hadebe.