Tau yeo e bolailego diruiwa e hweditšwe, ya išwa Kruger National Park
Tau ya poo yeo e bolailego diruiwa kgauswi le mollwane wa Giyani–Phalaborwa mathomong a kgwedi ye e hweditšwe gomme ya išwa lešokeng la diphoofolo la Northern Kruger National Park.
Kgoro ya Tlhabollo ya Ikonomi, Tikologo le Boeti ka Limpopo mmogo le SANParks le Endangered Wildlife Trust (EWT) di tšwele lesolo la go tsomana le tau ye morago ga gore e bolaye diruiwa ka Labobedi, 16 le Sontaga, 21 Lewedi.
Molekgotlaphethiši wa kgoro, Tshitereke Matibe o re lesolo leo e be e le go šireletša setšhaba gammogo le tau yeo. “Bahlokomedi ba diphoofolo ba rena le batšeya karolo ba šomile ka maatla go šireletša setšhaba sa rena le bohwa bja diphoofolo tša naga,” a realo.
Matibe o hlohleleditše badudi bao ba dulago kgauswi le mašoka a diphoofolo gore ba se ke ba sega goba ba senya legora ka ge seo se oketša kotsi ya kgohlano magareng ga batho le diphoofolo.
Balaodi ba netefaditše gore go na le ditau tše pedi tše dingwe ka Mtimkulu Nature Reserve kgauswi le Giyani. Ga se tša tsena mafelong a setšhaba goba go bolaya diruiwa, eupša maano a gore di hwetšwe gomme di išwe Kruger a ya kgatlampana
Matibe o re mmušo o tla tšwelapele go lekalekanya tshireletšo ya setšhaba le polokego ya diphoofolo. O boletše ka gore: “Go šotišwa ga tau ye go bontšha gore ge re šoma mmogo re ka šireletša maphelo, mešomo ya rena le bohlokwa bja diphedi tša naga tšeo di dirago Limpopo letlotlo la lefase.”
