Masole a mabedi a swere polaong ya mohlankedi wa maphodisa wa Hawks
Bahlankedi ba babedi ba Sešole
sa Afrika Borwa (SANDF), ba mengwaga ye 36 le 51, ba swerwe ka Sontaga, la 22 Mosegamanye 2025, Boemafofaneng bja Boditšhabatšhaba bja OR Tambo le ka Centurion, Pretoria.
Masole a swerwe ke maloko a Hawks’ Serious Organized Crime Investigation go amana le polao ya Lieutenant Colonel Frans Mathipa, yo a thuntšhitšwego a bolawa ge a be a otlela tseleng ye kgolo ya N1 kgauswi le Hammanskraal ka la 06 Phato 2023.
Ka morago ga go thuntšhwa, koloi ya gagwe e ile ya lahlegelwa ke taolo gomme ya fapogela ka mokerong.
Go ya ka mmoleledi wa Hawks Kolonele Christopher Singo, Kolonele Mathipa, yo a bego a šomela karolo ya Hawks’ Crimes Against the State ka gare ga dinyakišišo tša bosenyi bjo bo rulagantšwego bjo bogolo ka Gauteng, o be a le mošomong a dira dinyakišišo ka nako ya lehu la gagwe.
Nakong ya go swarwa ga bagononelwa, maphodisa a thopile gape sefatanaga sa mogononelwa wa mengwaga ye 36.
“Go thwe sefatanaga se se šomišitšwe go thopeng ga batho ba babedi ba banna ba dinaga dišele lefelong la mabenkele ka Midrand ka la 29 Dibatsela 2022. Sefatanaga seo Ga e sa le go tloga fao se ile sa golegwa gore go dirwe dinyakišišo tše dingwe tša forensiki,” Singo a realo.
Bagononelwa ba tla tšwelela pele ga Kgorotsheko ya Mmaseterata wa Randburg ka Mošupologo, la 23 Mosegamanye 2025, moo ba tlago lebana le ditatofatšo tša polao le go thopa.
