IEC e gana ngwadišo ya mokgatlo wa Boy Mamabolo wa “Mandela for President”
Khomišene ye e Ikemego ya Dikgetho (IEC) e ganne go ngwadišwa ga mokgatlo wo mofsa wa dipolotiki wa Mopalamente wa peleng wa ANC Boy Mamabolo.
Boy, o lekile go ngwadiša mokgatlo wo a go bitšago “Mandela for President” morago ga gore a fegigwe go tšwa go ANC.
Ka polelo, IEC e hlalositše gore mokgatlo wa Boy o paletšwe ke go fihlelela dinyakwa tše bohlokwa, go akaretšwa palo ya fasefase ya ditshaeno tše di šomago le moedi wa bakgethi bao ba ngwadišitšwego.
“IEC e hlakiša gore mokgatlo wa f Mandela for President o dirile kgopelo ya go ingwadiša, eupša o ile wa ganwa ka lebaka la go se obamele dinyakwa tša go saena le moedi wa bakgethi bao ba ngwadišitšwego bao ba nyakegago. Go feta moo, leina Mandela for President, ka mebala ye tala le ye metšo yeo e amanago le yona e ka hlathollwa ke bakgethi bjalo ka yeo e kgokaganego le Mopresidente wa motheo Nelson Mandela. Go tlaleletša, go se dumelelane go gona magareng ga ditokomane tša molaotheo tša mokgatlo le direkhoto tša rena tša ngwadišo mabapi le boetapele bja mokgatlo,” IEC e boletše ka polelo.
“Ketapeleng ya molaotheo wa bona mokgatlo o tsebagatša gore mokgoboketši wa bona wa motheo ke Mandela Jacob Boy Mamabolo.Le ge go le bjalo, direkoto tša rena tša ngwadišo mabapi le moetapele wa mokgatlo o tšwelela e le Jacob Boy Mamabolo fela, seo se šišinyago gore lehlakore la dilo tše di bonagalago go ngwadišong ya mokgatlo le ka ba le emetšwe gampe. Mokgatlo o dula o sa ngwadišwa.
IEC e bontšhitše gape go tshwenyega ka gore leina la mokgatlo, gotee le botala bja wona le boso mebala, e ka aroša bakgethi gore ba dumele gore e na le tswalano le mohu Mopresidente wa peleng Nelson Mandela.”
Ka lebaka leo, mokgatlo wa Boy o sa ngwadišwa ebile ga o swanelege go tšea karolo dikgethong tše di tlago.
