Kgorotsheko ya Polokwane e ganeditše Rachel Kutumela, kgaetšedi ya gagwe Annah Shokane le morwedi wa gagwe Flora Shokane ka beile
Mošomi wa maphodisa wa kgale setišing sa Senwabarwana, Rachel Kutumela (43), kgaetšedi ya gagwe Annah Shokane (47) le morwedi wa gagwe Flora Shokane (23) ba tla dula ka kgolegelong ka morago ga ge Kgorotsheko ya Polokwane e ganne go ba lokolla ka beile ka Labobedi, 2 Lewedi.
Boraro bja bona ba tšwa Makgofe, Moletjie ka ntle ga Polokwane ba lebagane le melato ye senyane ya polao, ye 12 ya boradia, go hlatswa tšhelete, go amogela ditšhelete tša ditiro tša bosenyi le go thibela toka.
Rachel le morwedi wa gagwe Flora ba lebagane gape le melato ye e kgethegilego go akaretša ya go hlatswa tšhelete. Ba swere ka kgwedi ya Diphalane 2024.
Go thwe banyakišiši ba bolela gore magareng ga 2013 le 2022, Rachel le Annah ba ile ba bula dipholisi tša maphelo le tša dipoloko ka maina a batho ba bangwe, gomme ba hwetša tšelete ya go lekana R10 millione.
Mmoleledi wa National Prosecuting Authority (NPA) Limpopo, Mashudu Malabi-Dzhangi o re go thwe tšhelete yeo e ile ya abelwana le Flora, mme di patetšwe go tšwa go ABSA, Standard Bank, Capitec, Hollard, Assupol, Old Mutual, One Life, le Clientele.
“Kgorotsheko e boletše gore go ba lokolla ka beile go ka bea dipaki kotsing, gwa ba fa monyetla wa gore ba dire bosenyi bjo bongwe, le go senya tshepedišo ya toka. E bile e gateletše gore melato ye ba lebanego le yona e na le dikotlo tše telele gomme mmušo o na le bohlatse bjo bo tiilego,” a realo.
Molato o bušeditšwe morago go fihla ka di 4 Dibatsela gore go dirwe dinyakišišo tše di oketšegilego, mme ba tla dula ka kgolegelong go fihla ka nako yeo.
