Lapa la monna yo a latofatšwago ka go bolaya mmagwe lere ke kgale a mo tlaiša

Ka Sekerela Seshibe

Ba lelapa la monna yo a swerwego mafelelong a beke ka ditatofatšo tša go bolaya mmagwe, ba re ke kgale a mo tlaiša.

Lesiba Ledwaba (40) o swerwe ka Mokibelo morago ga gore go begwe gore o bolaile mmagwe Raisibe Ledwaba (87) ka gae motseng wa Sebora ka Ga-Mashashane, Polokwane.

 

Maphodisa a ile a hwetša ditho tša mmele wa motšwasehlabelo di tsentšhitšwe ka gare ga dikgamelo.

 

Ledwaba o tšweletše kgorong tsheko ya maseterata ya Seshego ka Mošupologo.

 

Go ya ka maloko a lapa, Ledwaba o na le sebaka a tlaiša mmagwe yo a sa kago a mo bega maphodiseng.  

 

Mmoleledi wa lapa Ramokone Mothapo o boletše gore ba lelapa  be ba tseba gore Ledwaba o tlaiša mmagwe, eupša mmagwe o be a uta tlaišo yeo.

 

“O ile a kgetha go se bege morwa wa gagwe maphodiseng bjalo ka tsela ya go mo šireletša. Lesiba o be a sa tsebe go bolela le mmagwe. O be a dira bjalo gantši ge a be a nyaka tšhelete ya mokgekolo ya phenšene. Re ile ra leka go tsena ditaba ka bogare, eupša go yena e be e le tsela ye e tlwaelegilego ya go boledišana le mmagwe.” 

 

“Mokgwa wo rakgadi a bolailwego ka wona e be e le wo šoro. Go bona ditho tša mmele wa gagwe ka gare ga dikgamelo e bile bohloko kudu,” Mothapo a realo.

 

 Mmoleledi wa kgoro ya tlhabollo ya leago ya Limpopo Joshua Kwapa o boletše gore ba befeditšwe ke tiragalo ye.

 

 “Dibekeng tše mmalwa tše di fetilego, motšofadi o bolailwe tikologong yeo. Basadi le bana ba dula ba hlaselwa, gomme ge tiragalo ye e begwa, go be go swana le ge dikhampheini tša rena di be di wela ditsebeng tše di sa kwego. Bjalo ka maikarabelo a kgoro ya rena, re tla romela badirelaleago go fa thekgo ya tša monagano le tša leago go lapa leo le hlokofaletšwego,” Kwapa o boletše.

 

Molato wa Ledwaba o bušeditšwe bekeng ye e tlago ka Mošupologo bakeng sa kgopelo ya peile.