Roads Agency Limpopo e tsenetše tumelelano ya tšhomišanommogo le moepo wa De Beers Venetia go matlafatša ditsela ka tšhelete yeo e lekanago R184 millione
Kgoro ya Mešomo ya Setšhaba, Ditsela le Meago ka Limpopo e tsenetše tumelelano le moepo wa De Beers Venetia go matlafatša ditsela tše bohlokwa profense ka bophara.
Molekgotlaphethiši Ernest Rachoene o etile pele tirelo ye ya go swaya tumelelano ya tšhomišanommogo magareng ga Roads Agency Limpopo (RAL) le moepo wa De Beers Venetia ka Labobedi, 2 Lewedi.
Rachoene o re tšhomišanommogo ye ke kgato ye bohlokwa ya tšhomišano magareng ga mmušo le lekala la praebete go hwetša tšwetšopele ya meago ya ditsela, kudu mafelong a dithaba tša meepo.
Ka gare ga tumelelano yeo go tla tšewa magato a kaonafatšo ya ditsela ka R184 millione. Ditsela tšeo di akaretša ya D2692 moepong wa Venetia go lebana le toropo ya Musina ka R100 millione.
Tsela ya D1589 Taaibosch Groet ka masepaleng wa Blouberg ka R50 millione le diphetogo tša ditsela tša ka gare ga Musina ka R34 millione.
“Diprojeke tše ga se tša ditsela feela,” gwa realo Rachoene nakong ya tiragalo. “Ke ka go hlola mešomo, go kaonafatša mosepelo, le go bulela mafelo a magaeng le a meepo menyetla ya ekonomi,” a realo.
O re tšhomišanommogo ye e oketša maiteko a mmušo mme e bontšha boitlamo bja bona bja kgolo yeo e akaretšago batho ka moka.
“Tšhomišanommogo ye e tla thuša go rarolla mathata a ditšhelete le mehuta ya meago yeo e bego e šaletše morago ka go netefatša gore diprojeke tša ditsela di fetšwa ka pela le go thekga tshepedišo ya ekonomi gammogo le go kaonafatša boleng bja maphelo a badudi,” gwa realo Rachoene.
