Mahodu a nyametše le dipudi

Maphodisa a nyakana le batho bao ba belaelwago ka go utswa dipudi tše 50.

Tiragalo ye e diregile ka Laboraro, 30 Mosegamanye kua The Oaks go la Hoedspruit, Limpopo.

Go ya ka tshedimošo, mong wa dipudi o be a di tswaleletše pele a ya robala, gomme ka morago a kwa modumo wa sefatanaga se sepela ka lapeng la gagwe.

O ile a tšwela ka ntle go yo hlola, a hwetša gore dipudi tše 50 di nyametše efela go sa bonagale motho goba sefatanaga.

Mmoleledi wa maphodisa a Limpopo, Colonel Malesela Ledwaba o re taba ye e begilwe setišing sa maphodisa sa Hoedspruit gomme mošomo wa go nyakišiša o fetešeditšwe go sehlopha sa Maake sa bohodu bja leruo.

“Maloko a sehlopha sa bohodu bja leruo a nyakišiša molato wa bohodu bja leruo ka morago ga ge batho bao ba sa tsebjwego palo ya bona ba utswitše dipudi tše 50. Theko ya leruo leo le akanyetšwa go ba R75 000,” a realo.

Ledwaba o re mang le mang yo a nago le tshedimošo yeo e ka thušago maphodisa go swara batho ba go amega, a ka ikgokaganya le Sergeant Thembi Mushwana mo go 082 565 8596 goba a etele setiši sa maphodisa sa kgauswi.

“Dinyakišišo tša maphodisa di tšwela pele,” gwa realo Ledwaba.