Lephodisa la Lebowakgomo le tla dula mengwaga ye 15 kgolegong morago ga go bonwa molato polaong ya modudi

Lephodisa le tla fetša mengwaga ye 15 kgolegong.

Se se latela morago ga gore Avhahumi Aldolphus Netshikweta (41) yo e le go lephodisa la Lebowakgomo ka ntle ga Polokwane a ahlolelwe kgolegong molatong wa go bolaya modudi nakong ya tshepedišo ya go thibela bosenyi ka di 20 Lewedi 2017 go la Lebowakgomo.

Go bolelwa gore maloko a sehlopha sa maphodisa a Lebowakgomo ba emišitše sefatanaga seo se be go se belaetša nakong ya tshepedišo ya go thibela bosenyi ka kgwedi ya Lewedi 2017.

Mmoleledi wa Independent Police Investigative Directorate (IPID), Lizzy Suping o re go thwe mootledi o ile a gana go ema gomme a šupa maphodisa ao ka sethunya.

“Molatofatšwa yo wa lephodisa o ile a thuntšha ga bedi a lebantšhitše go mootledi yoo, gomme a mmolaya. Go thwe sethunya se hweditšwe go mohu, mmogo le patše le dihlare tša nyaope,” a realo.

Kgorotsheko ye kgolo ya Limpopo gape e tšere sephetho sa gore Netshikweta ga se a lekanela go ba le maswanedi a go ba le sethunya.