BOSENYI KA BORIPANA: Maphodisa a tsomana le monna wa mo-Pakistan yo go thwego o  katile mosetsana ka lebenkeleng

Re go tlišetša ditaba tša moragorago tša bosenyi dikarolong tše di fapanego tša naga

 

BURGERSFOR: Banyakišiši ba Maphodisa ka Burgesfort ba nyaka thušo ya go hwetša monna wa mo-Pakistan yo a bitšwago Adino mabapi le molato wa go kata. Go thwe motšwasehlabelo wa mengwaga ye 12 go tšwa ka motsaneng wa Ga-Mampa o ile lebenkeleng leo mogononelwa a 

šomago gona gomme a kgopela Adino dipolasitiki tša go dira kgwele, ka ge a be a tlwaetše go ya lebenkeleng le bagwera ba gagwe.  Mmoleledi wa maphodisa Colonel Malesela Ledwaba ore ka letsatsi leo, mogononelwa o ile a mo kata.

“Mosetsana yoo o ile a kgona go tšhaba nakong ya masetla-pelo gomme a kitimela gae, moo a ilego a bega tiragalo ye go mmagwe,” Ledwaba a realo. Mmago motšwasehlabelo o ile a bega tiragalo ye maphodiseng.  Go ile gwa thongwa go tsoma Adino, eupša ga se a hwetšwa.

Mang le mang yo a nago le tshedimošo a ka ikgokaganya le mohlankedi wa dinyakišišo Constable Mildred Manamela Mabotja go 071 355 0571 goba nomoro ya go emiša bosenyi 08600 10111.

 

KOMANI: Sefepi se segolo sa mmasepala wa selegae wa Emalahleni ka mmasepaleng wa selete sa Chris Hani ka Eastern Cape Xoliseka Lali o thuntšhitšwe ka Komani ka Labobedi. 

Go ya ka dipego, mosadi wa Lali’s o lekile go ikgokaganya le yena ka masa a Labobedi eupša a se atlege. Ka lebaka la go tshwenyega, o ile a kgopela buti wa mohu gore a mo lebelele foleteng yeo a bego a dula go yona.  “Ge a fihla, ngwanabo mohu  o ile a hwetša kgoro ya tšhireletšo le lebati la ka pele di bulegile.

O ile gape a hwetša dikolo tša sethunya,”mmoleledi wa maphodisa Brigadier Nobuntu Gantana o boletše. “Ge a tšwela pele go ya phapošing ya go robala, ya mohu, o ile a hwetša ngwanabo a robetše mpeteng a na le dintho tše dintši tša go thuntšhiwa mmeleng le mokokotlong.”

 

Maikemišetšo a polao ye ga bjale ga a tsebje.  Mang le mang yo a nago le tshedimošo yeo e ka thušago dinyakišišo tše, o hlohleletšwa go ikgokaganya le Mogala wa go Emiša Bosenyi wa SAPS go 08600 10111.

POLOKWANE: Bahlankedi ba senyane ba Tirelo ya Kgalemelo go tšwa kgolegong ya Polokwane ba tšweletše pele ga kgoro tsheko ka la 22 Phupu 2025. Ba latofaditšwa ka polao morago ga lehu la mogolegwa yo a bego a le kgolegong ka Phupu 2024. Bagononelwa ba akaretša Victor Ramoroka, Victor Seakamela, Lutendo Vele, Christopher Mafela, Micharl Ramabu, Anna Shai, Josephine Mphela, Obed Selolo, le Lucas  Phihlela.

Go thwe mogolegwa o ile a hlaselwa gomme ka morago a hlokofala ka baka la dikgobalo.  Taba ye e ile ya begwa maphodiseng gomme ka nako yeo, molato o ile wa ngwadišwa. Nakong ya lebaka la dinyakišišo le ka morago ga dipoelo tša nyakišišo ya setopo, molato o ile wa fetošetšwa go wa polao.

Bagononelwa ba senyane ka moka ba filwe peile ya R1 500 yo mongwe le yo mongwe.  Taba ye e ile ya bušetšwa morago go la 21 Phato 2025 bakeng sa letšatšikgwedi la Kgorotsheko ya Selete le dinyakišišo tše dingwe tša maphodisa.

 

NTUZUMA: Phathesakhe Thuthukani Ngiba (25) o ahloletšwe bophelo ka moka le mengwaga ye 12 kgolegong ka lebaka la polao ya mokhanselara wa ward ya Mmasepala wa iLembe ka September 2022 tikologong ya Kwa-Maphumulo. 

Go ya ka mmoleledi wa KwaZulu Natal NPA Natasha Ramkisson-Kara, mohu Zakhele Khuzwayo (44) o be a otlela koloi ya gagwe tseleng ya mmu tikologong yeo ge a ema go bolela le motho yo a mo tsebago. 

 

“Ge yena le motho yoo ba be ba bolela, koloi ye ngwe e ile ya ba batamela, gomme monna yo a sa tsebjego o ile a fologa a ya koloing ya Khuzwayo. Dikolo tše mmalwa di ile tša thuntšhwa sefatanaga sa Khuzwayo, gomme mothuntšhi a tšhaba lefelong leo.  Monna yo a bego a na le Khuzwayo o ile a kitimela lefelong la kgauswi go hwetša thušo,” Kara o boletše. Ngiba o ile a feleletša a golegilwe ka morago ga gore maphodisa a latišiše dikgatišo tša menwana ya gagwe go tšwa lefelong la bosenyi.