DA e re e tshwenyegile ka boemo bjo bo senyegilego bja seteišene sa maphodisa sa Villa Nora

Ka Mogale Mohale

Maphodisa a setiši sa Villa Nora motseng wa Shongoane ka ntle ga Lephalale, Limpopo a goga boima go phetha mešomo ya bona.

 

Ketelo ya hlahlobo ka leloko la Palamente ebile e le hlogo ya bakgethi mokgatlong wa Democratic Alliance (DA) masepaleng wa Lephalale, Beyer Smit e utollotše seemo se šoro sa setiši se.

 

Maphodisa a šomela ka gare ga moago wa go senyega wo o be go o šomišwa ke batšofe go hwetša mphiwafela ka ge moago wa setiši o senntšwe.

 

Smit o re ga gona mohlagase wa go tshepiša, didirišwa tša dikgokaganyo, kelela tšhila ya maleba gammogo le meetse.

 

“Meetse a hwetšagala ka ntle ga moago mme ntlwana tša boithomelo ga se tša hlweka le ge tša go thetha di dutši fela ka ge di sa šome,” a realo.

 

Le ge e le gore palo ya melato ya kato le tshohlego ya bong e le godimo, setiši ga sena phaphoši ya go thekga batšwa sehlabelo.

 

“Hlokego ga maphodisa ao a lekanego go dira gore go be kotsi go setiši se. Maphodisa a ma bedi a šogana le melato ye 300 mme molaodi wa setiši o šogana le ye 250,” a realo.

 

O re go difatanaga tše senyane tšeo di abetšwego setiši, tše nne di ile go lokišwa gomme tše seswai di fetile 250 000km.

 

“Difatanaga tšeo ga se tša lokela lefelo la motse legae go swana le le. Maphodisa a šoma ntle le didirišwa tša go ba šireleletša ebile maphodisa a basadi a hloka separo sa maleba sa go thibela dikolo ,” a realo.

Ba bangwe ba badudi ba re setiši se ga se na mohola. “Nkabe se tswalelwe ka gore ge re hloka thušo re botšwa gore ga gona difatanaga. Ga se ra bolokega ka fase ga sona,” gwa realo modudi (37).

 

Mmoleledi wa kgoro ya Dinamelwa le Tšhireletšo ya Setšhaba, Tshifiwa Dali o re setiši sa Villa Nora se tswaletšwe ka 2020 ka morago ga pula ya mafula yeo e senntšego leporogo leo le yago setišing.

 

“Nakong ya lebaka nyana, maphodisa a šomiša moago wa ntlo ya phaphoši tše tharo, efela ga se ya lokelwa dinyakwa tša mošomo. Rakontraka o kgethilwe ka kgwedi ya Moranang go aga meago e mengwe mme go letelwa go fela ka kgwedi ya Dibatsela,” a realo.