Mmolai wa Sindiso Magaqa o ahloletšwe mengwaga ye 85 kgolegong
Monna yo a iponego molato polaong ya Mongwaledipharephare wa peleng wa ANC Youth League Sindiso Magaqa o ahlotšwe mengwaga ye 86 kgolegong.
Sibusiso Ncengwa o ile a ipona molato ditatofatšong tšeo di akaretšwa polao, maitekelo a polao, tshenyo ya dithoto ka maikemišetšo a mabe, le ba le dithunya tšeo di se go molaong.
Kgorotsheko e hweditše gore dithunya tšeo di amana le polao ya Magaqa ka Phupu 2017 ka uMzimkhulu, KwaZulu-Natal.
Moahlodi Nompumelelo Radebe o file kahlolo ya gagwe kgorongkgolo ya tsheko ya Pietermaritzburg ka Mošupologo.
“O ahlolelwa go ya kgolegong mengwaga ye 25 ka go ba le leano la go bolaya. Molatong wa bobedi wa polao, o ahlolelwa mengwaga ye 25.”
“O ahlolelwa go kgolegong mengwaga ye mehlano mo maitekelong a polao,” Moahlodi Radebe a realo.
Moahlodi Radebe o ile a amogela go itshola le tirišano ya Ncengwa le banyakišiši, go akaretšwa go bolela maina a bao go thwego ke bao ba hlamilego polao ye.
Eupša o boletše gore se ga se ra gore a ka mo dumelela go boela setšhabeng.
“Ka go go tloša setšhabeng, kgahlego ya setšhaba e be e tla hlankelwa. Boitshwaro bja gago bja go dumela go tšea bophelo bja motho bo bontšha go hlokomologa bophelo bja motho ka mo go kwagalago. Tokelo ya bophelo ke yeo o e thabelago ga bjale, eupša yeo o e tšerego mohu le ka mabaka a boithati.”
