Molekgotlaphethiši Basikopo Makamu o re ba ile go tšeya magato kgahlanong le batho bao ba ipitšago magoši ntle le tumelelo

Molekgotlaphethiši wa Kgoro ya Pušotirišano, Bodulo bja Batho le Merero ya Setšo, Basikopo Makamu o kgadile ka bogale batho bao ba ipitšago magoši ntle le tumelelo.

Se se latela morago ga ge motho yo mongwe a ipitšitše gore ke yena Kgoši Nkwe Moses Matabola, kgoši ya mošate wa Matabola.

Makamu o re le ge motho yoo e se kgoši yeo e tsebegago semolao mo profenseng, o tšwela pele ka go laletša kantoro ya tonakgolo gammogo le ya gagwe meletlong ya gagwe ya go fapafapana gantši.

“Go fihla moo a laletšago modudi wa pele wa profense, nna le baetapele ba bangwe ba mmušo meletlong yeo a e bitšago mošate wa Matabola, ke selo se se nyatšago bolaodi bja profense, molao wa naga le seriti sa baetapele ba setšo bao ba amogetšwego semolao,” a realo.

Kgoro e ile ya ntšha tsebišo ka kgwedi ya Phupu go kgala bao ba ipitšago magoši ka tshepo ya gore Matabola le bao ba šomago le yena ba tla tlogela go dira dilo tše di sego molaong.

Makamu o re bjale go bonagala gabotse gore mediro yeo e dirwa ka maikemišetšo a go roba molao, go nyatša tonakgolo, molekgotlaphethiši, boetapele bjo bo tsebegago bja dikgoši, dikgošigadi le setheo sa boetapele bja setšo ka kakaretšo mo profenseng.

“Matabola o itira kgoši, selo seo e le go go tshela temana ya 7(9) ya Molao wa Boetapele bja Setšo le bja Khoi-San, wa 2019 (Molao 3 wa 2019), wo o rego motho yo a sego a amogelwa bjalo ka moetepele wa setšo efela a ipitša bjalo, o dira phošo gomme ge a ka hwetšwa molato, a ka lefišwa tšhelete goba a swarwa mengwaga yeo e sa fetego ye meraro,” a realo.

O re ditiro tša Matabola di bakile phapano ye kgolo le tshenyo mo profenseng. “Go kweša bohloko go bona motho a nyaka go hlola merusu ka tsela ye. Ka lebaka leo, mmušo o tla tšea kgato gomme molao o tla dirišwa,” a realo. O re taba ye e išitšwe go mafapha a tshepetšo ya molao.