Palo ya mahu ao a hlotšwego ke mafula ka EC  e hlatlogetše go 88

Dihlopha tša tlhakodišo di tšwela pele go hwetša ditopo ka morago ga mafula a Mthatha ka Kapa Bohlabela. Seo se iša palo ya mahu go 88.

Mmušo wa profense o re ditopo tše 83 di hlaotšwe gabotse ke malapa gomme ditopo tše hlano ga se tša hlwa di hlaolwa.

Ka Mokibelo, setopo sa mosetsana wa mengwaga ye lesome yo a ilego a gogolwa nakong ya mafula se hweditšwe. 

Mafula a go tšhoša  a ilego a hlasela profense bekeng ya go feta a hlola tshenyo ye e atilego, ya huduša malapa, le go senya mananeokgoparara. 

 Hlogo ya sehlopha sa go nyaka le go phološa sa Gift of the Givers Ahmed Bham o boletše gore ba na le sehlopha sa go nyaka le go phološa sa dikarolo tše dintši seo se bopilwego ke SAPS, Kgoro ya Maphelo le Mpho ya Baabi. 

 “Re boletše gore mo matšatšing a mabedi a tlago, re ya go gakatša dinyakišišo tša rena, gomme re na le mahlatse a go ba le lephego la moya la SAPS leo le re thušago. Re be re le ka sefofaneng gape go lebelela Letamo la Mthatha, le fofela dinokeng, ge re hwetša ditopo tše pedi lefelong le tee ka Mokibelo,” a realo Bham.

Mopresidente Cyril Ramaphosa o etetše tše dingwe tša ditšhaba tšeo di amegilego ka Labohlano, moo a laeditšego matshidišo a gagwe go pgo malapa ao a hlokofetšego ka ditšhabeng tšeo di amegilego.

Mopresidente o etetše gape leporogo la Efata leo le phuhlamego ka Mthata, moo thekisi yeo e bego e sepetša bana ba dikolo e ilego ya gogolwa, ya bolaya barutwana ba bonnyane ba tshela gammogo le mootledi le mohlahli, mola ba bangwe ba sa timetše.