Barutwana ba sekolo seo se kgethegilego le bašomi ba Kgoro ya Thuto ba gobetše morago ga go amega kotsing ya sefatanaga

Senamelwa sa Kgoro ya Thuto seo se bego se rwele batho ba 39, go akaretša le barutwana ba 30 ba sekolo se se kgethegilego se amegile kotsing tseleng  ya R71 go la Magoebaskloof ka ntle ga Polokwane.

Kotsi ye e tlogetšego bontši bja batho ba gobetše e diregile ka Labone mesong, 21 Phato moo moela wa sephethephethe o šitišegilego dikhilometara tše mmalwa.

Bahlapetše ba tshoganetšo ba gorogile ka pela lefelong la kotsi moo bahlapetšhe ba sephethephethe le bona ba ile ba šoma ka thata go laola moela wa sephethephethe.

Mmoleledi wa Kgoro ya Dinamelwa le Tšhireletšo ya Setšhaba, Tidimalo Chuene o re baoki ba ile ba thuša bao ba gobetšego. “Bao ba gobetšego ba ile ba išwa bookelong bja Tzaneen Medicare, Van Velden le Letaba gore ba hwetše kalafo ya maleba,” a realo.

O re bašomi ba maleba ba re ga ba tsebe seo se hlotšego kotsi ye ka se sebaka. “Go šetše go bulegile mothaladi o tee wa tsela fela, gomme bahlapetše ba sephethephethe ba hlohleletša baotledi go otlela ka hlokomelo le go se fele pelo ge ba feta lefelong la kotsi,” gwa realo Chuene.

Tshedimošo ya botlalo, go akaretša le maemo a bao ba gobetšego e tla lokollwa ka morago ga ge malapa a hwetša tsebišo gomme lefelo le la kotsi le hlwekile.