Tonakgolo Ngk Phophi Ramathuba o hlomphile koko Nomgqibelo Mahlangu ka go keteka letšatši la matswalo a gagwe a mengwaga ye 102 le yena

Tonakgolo ya Limpopo, Ngk Phophi Ramathuba mmogo le mokhomišinare wa maphodisa a profense, Lieutenant-General Thembi Hadebe ba hlomphile koko Nomgqibelo Mahlangu ka go keteka letšatši la matswalo a gagwe a mengwaga ye 102.

Keteko ye e diregile ka Laboraro, 13 Phato lapeng la gagwe motseng wa Sehlapahlapane go la Zaaiplaas, Sekhukhune.

Koko Mahlangu ga se fela motšofe wa mengwaga e mentši, eupša ke mofenyi wa tshohlego ya basadi le bana (GBV) ka ge a ile a phologa go hlaselo ye šoro ka 2024.

Bophelo bja gagwe bjo bo tletšego boikokobetšo le sebete e bile selo se bohlokwa moletlong wo, woo gape o šomišitšwego bjalo ka sefala sa go tšea magato a go lwantšha mathata a setšhaba, kudu GBV.

“Se ga se fela moletlo wa matswalo,” gwa realo Tonakgolo Ramathuba. “Re leboga Modimo ka go mo boloka a phela. Re ikgantšha ka koko Mahlangu gomme re mo lakaletša mengwaga e mentši ya lerato le seriti,”

Ramathuba o hlohleleditše setšhaba go boela mekgweng ya Ubuntu, ka go hlokomelana le go šoma mmogo go fenya tshohlego.

O kgadile ka bogale bao ba šireletšago bahlokofatši le mahodu, a re: “Ge re šireletša bosenyi, re eka batšwasehlabelo. Re swanetše go bolela nnete le go šoma le maphodisa go netefatša toka,”

Lieutenant-General Hadebe o dumelelane le mantšu a tonakgolo, a gatelela gore GBV e sa le bothata bjo bogolo Limpopo, mme a hlohleletša banna go tšea karolo ya go fediša hlobaboroko ye.

Moletlo o be o tletše ka mmino, thapelo le ditakatšo. Koko Mahlangu o ketekilwe bjalo ka mosadi wa bohlale, sebete le tirelo setšhabeng.