BANYALANI BA ZIMBABWE BA SWARETŠWE GO SEPEDIŠA KHEMISI YEO E SEGO MOLAONG KA KIMBERLY

Monna le mosadi ba go tšwa Zimbabwe ba swerwe ka Galeshewe, Kimberley, ka lebaka la go ba le khemisi yeo e sego molaong.

Maloko a Kimberley Public Order Police a etetše moago ka Galeshewe ka Mokibelo, 11 Diphalane morago ga go hwetša tshedimošo ka ga mediro ye e belaetšago lefelong leo.

Lieutenant Colonel Tebogo Thebe, mmoleledi wa Hawks ore maloko a maphodisa a utollotše morwalo o mogolo ya dihlare le tšhelete ye e nyakilego go ba R160 000 mo lefelong leo gomme ba ga Hawks ba ile ba bitšwa.

“Monna le mosadi, bobedi bja bona ba mengwaga ye 34, ba swerwe ka lebaka la go tshela Molao wa Taolo ya Meriana gomme dihlare di be di akaretša mapotlelo a 114 a sirapo ya Painogon, mabotlelo a 100 a sirapo ya Stilpane, mabotlelo a 100 a sirapo ya Broncleer, mabotlelo a 30 a sirapo ya Lenazineforte, le matlapa a Mylon a 431 a ile a thopša, “Thebe o boletše.

O okeditše ka gore lepotlelo le lengwe le le lengwe la sehlare le be lee rekišwa ka R60.

Nakong ya go phuruphutša, bahlankedi ba ile ba lemoga monkgo o matla wa cannabis wo o tšwago ka phapošing e nngwe ka jarateng yona yeo. Se se ile sa lebiša go utollweng ga cannabis ya boleng bjo bo ka bago R90 000 yeo e bego e le ka gare ga mekotla ya polasitiki ye ntsho.

“Sehlopha ga se sa kgona go kgokaganya cannabis le motho ka ge go se na motho yo a hweditšwego ka phapošing. Dinyakišišo tša kgokagano di tšwela pele,” Thebe a tlaleletša.

Banyalani ba ba letetšwe go tšwelela kgorong ya tsheko ya Bomaseterata ya Kimberley ka Mošupologo, la 13 Diphalane.