LEŠOLE LA SANDF LE THUTSITSE MORWA WA LONA PELE A LEKA GO IPOLAYA
Leloko la Sešole sa Tšhireletšo ya Setšhaba sa Afrika Borwa (SANDF) le ka fase ga tlhokomelo ya maphodisa sepetlele morago ga gore a leke go ipolaya ka Sontaga morago ga go thuntšha le go bolaya morwa wa gagwe wa mahlalagading go fihla a bolaya.
Go thwe tate wa mengwaga ye 53 o thuntšhitše le go bolaya morwa wa gagwe wa mengwaga ye 17 motseng wa Mutsha, Tshitandani, Seleteng sa Vhembe.
Mmoleledi wa maphodisa Colonel Malesela Ledwaba ore maphodisa a Levubu a amogetse mogala mabapi le tiragalo ya go thuntsha gomme ge ba fihla lefelong leo, ba hwetša tate a robetše fase ka letamong la madi gomme a sa phela. Kgauswi le yena go be go na le sethunya sa 9mm. Di- catridge tše mmalwa di ile tša hwetšwa kgauswi le yena.
“Dinyakišišo tše dingwe di ile tša dira gore maphodisa a tsene ka gare ga ntlo moo ba hweditšego morwa wa gagwe wa mahlalagading a robetše malaong a na le dintho tša kulo hlogong,”Ledwaba o boletše.
Lešole leo gape e lego leloko la SANDF leo le lego ka ntle ga Mookgophong le ile la išwa Sepetlele go hwetša kalafo ka fase ga tlhokomelo ya maphodisa.
Maikemišetšo a ditiragalo tše ga bjale ga a tsebje, eupša voilance ya ka gae e ka se ke ya lahlwa ka ge ba be ba dula ka ntlong.
Mokhomišinare wa Maphodisa wa Limpopo Leutenant General Thembi Hadebe Hadebe o ipileditše go malapa go nyaka thušo ya profešenale ge ba itemogela ditlhohlo tša ka gae go e na le go retologela dikgaruru.
