Mogononelwa o swerwe kua Beitbridge morago ga go hwetšwa ka sefatanaga seo go gononwago gore se utswitšwe

Ka Mogale Mohale

Mogononelwa wa mengwaga ye 44 o golegilwe melatong ya go hwetšwa ka sefatanaga seo go gononwago gore se utswitšwe gammogo le bomenetša.

Mogononelwa yo o golegilwe ke bahlahlobi ba go lekola difatnaga mollwaneng wa Beitbridge, Musina ka Mošupologo, 16 Phupu.

O be a leka go šušumetša sefatanaga sa Hyundai H1 nageng ya Zimbabwe.

Sefatanaga se se tlaleilwe gore se utswitšwe Pretoria, Gauteng Profense ka kgwedi ya Phato 2024. Nakong ya ge a tlo golegwa, o šomišitše matlakala a bofora a sefatanaga seo.

Mmoleledi wa maphodisa a Limpopo, Colonel Malesela Ledwaba o re ka fao, mogononelwa yoo o lebagane le molato o mongwe bomenetša.

“O golegilwe le semetseng mme a lahlelwa kgolegong moo a pharilwego ka melato ya go hwetša ka sefatanaga seo se utswitšwego le bomenetša. Koloi yeo e tšerwe bjalo ka karolo ya dinyakišišo,” a realo.

Mogononelwa o ile go tšwelela pele ga kgoro ya tsheko ya Musina mo nakong yeo e sa fetšego pelo mme dinyakišišo di tšwela pele.

Mokhomišinare wa maphodisa a Limpopo Lieutenant-General Thembi Hadebe o amogetše go golegwa ga mogononelwa yo, a reta gape le bašomi ba Beitbridge ka go dula ba ntšhitše mahlo dinameng kgahlanong le bosenyi.