Molekgotlaphethiši wa peleng wa Limpopo o ahlotšwe ka lebaka la go kgopela tsogolekobong

Molekgotlaphethiši wa peleng wa polokego wa Limpopo Seth Nthai o ahlotšwe mengwaga ye mebedi kgolegong goba tefo ya R500,000.

Kahlolo ya gagwe e tla morago ga gore a ipone molato wa bomenetša gomme a tsenela tumelelano ya go le mmušo kgorongkgolo ya tsheko ya Johannesburg ya gore o ipona molato.

Nthai o lekile go kgopela tsogolekobong ya R5m go rakgwebo wa Motaliana Mario Vittorrio Marcenaro le badirišani ba gagwe ka 2009.

Go ya ka mmoleledi wa NPA Gauteng Phindi Mjonondwane, Nthai o dumetše gore o ile a keka go kgopela dimilione tšeo di bego di reretšwe go huetša dipoelo tša molato wa boahlamodi wa boditšhabatšhaba wa Piero Foresti le ba bangwe kgahlanong le Mmušo wa Repabliki ya Afrika Borwa.

Ka Laboraro, kgorotsheko e ile ya mo laela gore a lefe R50,000 ya mathomo le semetseng ka morago ga taelo yeo.  Ka morago ga fao, o  ile a laelwa go lefa R50,000 kgwedi le kgwedi go fihla ka Mopitlo 2026. 

 “Ge e bea kahlolo yeo, kgorotsheko e amogetše boima bja molato, ya lemoga gore mongongoregi tabeng ye e be e le Mmušo wa Repabliki ya Afrika Borwa. E ile ya lebelela gape le go ipolela molato ga Nthai le mengwaga ya gagwe,” Mjonondwane o boletše.

Nthai o ile a rakwa mošomong ka 2013 eupša ka morago a amogelwa gape ke Kgorokgolo ya Tsheko ya Limpopo yeo e hweditšego gore kgatelelo ya monagano le go tshwenyega di ka ba di hueditše maitekelo a gagwe a go kgopela tsogolekobong ya R5m. 

Ka morago Kgorokgolo ya Tsheko ya Boipiletšo e ile ya phekgola go amogelwa ga gagwe gape bareng gomme ya fetišetša kahlolo yeo go Bolaodi bja Botšhotšhisi bja Setšhaba gore e lebelele ditatofatšo tšeo di ka bago gona tša bosenyi.