Mosadi o swerwe ditatofatšong tša go kata mošemane

Mosadi wa mengwaga ye 24 o lebagane le molato wa kato ya mošemane wa mengwaga ye 13 kerekeng.

Mosadi yo a gononwago o tšweletše pele ga Kgorotsheko ya Musina mme molato wa šotišetšwa go Labobedi, 27 Phato gore a tsebišwe ka botlalo le gore go tšwetšwe pele ka dinyakišišo.

Mogononelwa, yoo leina la gagwe le ka se bolewe ka lebaka la dinyakišišo tše di tšwelago pele o ile a swarwa ke maphodisa ka letšatši la tiragalo yeo ka Labohlano, 22 Phato.

Go begwa gore mosadi yo o ile a bitša mošemane yo lefelong la bodulo la kereke go la Musina.

Mmoleledi wa maphodisa a Limpopo, Colonel Malesela Ledwaba o re go begilwe gore mosadi yo o ile a bitša ngwana yoo ge a be a feta kgauswi le sekolo sa bana se se lego lefelong leo.

“O rile ge a fihla a hwetša mosadi yo a robetše fase mme a sa apara selo. Mosadi yo o ile a thoma go mo swaraswara mmeleng gomme ka morago a mo dira tša thobalano lefelong leo le lego kgauswi le sedirišwa sa go lahlela ditšhila,” a realo.

Ledwaba o re yo mongwe wa badudi lefelong le o ile a bona tiragalo yeo nakong ya ge a ya go lahla ditšhila.

“Mohlokomedi wa lefelo leo o ile a tsebišwa ka tiragalo ye. Maphodisa a ile a bitšwa gomme gwa bulwa molato wa kato. Mogononelwa o ile a swarwa ka morago ga moo,” a realo. Dinyakišišo tša maphodisa di tšwela pele.