Monna o golegilwe morago ga go thula kgarebe ya gagwe ya peleng ka koloi gomme a bolaya ngwana wa gagwe  

Maphodisa a Mankweng a golegile monna wa mengwaga ye 35 ka morago ga go thula kgarebe ya gagwe ya peleng ka koloi le go bolaya ngwana wa mosadi yoo.

Go ya ka tshedimošo, mosadi yo o be a na le ngwana wa gagwe a emetše thekisi motseng wa Segopye ka iri ya seswai bošego ka Labohlano ge mogononelwa yo e lego lesogana la gagwe la peleng, a i lego a tla gomme ba ngangišana ka bogale.

Mmoledi wa maphodisa a Limpopo Colonel Malesela Ledwaba ore thekisi e ile ya fihlile, mosadi yoo le ngwana wa gagwe ba namela. 

 “Ge a le tseleng, mootledi wa thekisi o ile a mo tsebiša gore koloi ya bene e latela thekisi. Mma le ngwana ba fologile kua Marothi Cross, gomme lesogana la gagwe la peleng leo le bego le otlela bene ka lebelo le legolo, le ile la ba otlela ntle le go ema,” Ledwaba o boletše.

Ledwaba o okeditše ka gore bahlaselwa ba babedi ba ile ba išwa bookelong bja Mankweng ka dikgobalo tše šoro, gomme ka morago, ngwana wa dikgwedi tše 13 o hlokofetše.

Mma o ile a hwetša dikgobalo leotong la gagwe.

Molato wa polao le maitekelo a polao o ile wa bulwa gomme mogononelwa o swerwe.

Monna wa mengwaga ye 35 o tla tšwelela kgorong ya tsheko ya Mankweng Magistrates ka Mošupologo wa di 28 Phupu 2025. Dinyakišišo di sa tšwela pele.