Mogononelwa o thutše ka sefatanaga seo se utswitšwego mme se lebile Zimbabwe

Maphoisa a golegile mogononelwa wa mengwaga ye 22 yo a be go a leka go iša sefatanaga sa Toyota Prado VX se se jago boleng bja R1.2 millione go la Zimbabwe.

Mogononelwa yo o golegilwe ke maphodisa go la Solomondale ka ntle ga Polokwane ka Laboraro, 27 Phato. Se se latela morago ga gore go hwetšwe tshedimošo ka sefatanaga seo se utswitšwego Gauteng mme se išwa Zimbabwe.

Sefatanaga se e ile sa bonwa tseleng ya R71 se lebile Mankweng mme ge maloko a leka go se emiša, mootledi a thoma go otlela ka lebelo la godimo a lebile Solomondale.

Nakong yeo ya lebelo, mootledi o ile a thulana le sefatanaga sa hlogo ya sekolo kguswi le mothaladi wa terene. Sefatanaga se se emišitšwe sethokgweng kgauswi le tsela ya R81. Hogo ya sekolo o išitšwe bookelong.

Mmoleledi wa maphodisa a Limpopo, Colonel Malesela Ledwaba o re dinyakišišo di utollotše gore sefatanaga se se begilwe gore se utswitšwe go la Pretoria mesong ya letšatši leo.

“Mogononelwa wa monna wa mengwaga ye 22 o tshwerwe lefelong leo gomme o tla tšwelela pele ga Kgorotsheko ya Mankweng ka Labohlano, 29 Phato a lebagane le molato wa go utswa sefatanaga le go otlela bošaedi,” a realo.

Mokhomišinare wa maphodisa a profense, Lieutenant-General Thembi Hadebe o lebogile maphodisa ka katlego ya mošomo wo le tšhomišano ya go lwantšhana go fediša ga bohodu bja difatanaga tšeo di išwago dinageng tšedingwe.