Kgabo ya mollo e tlogetše baagolwa ba tshela gammogo le ngaka ya bona ya go bua ya setšo, yeo e le go mong wa koma le dikgobadi

Ka Mogale Mohale

Baagolwa ba tshela gammogo le ngaka ya go bua ya setšo ba tšwele dikgobalo komeng ya banna.

 

Se ke ka morago ga gore kgabo ya mollo e fiše koma motseng wa ga Maake ka ntle ga Tzaneen, Limpopo ka Labobedi bošego, 1 Mosegamanye.

 

Go ya ka ngaka yeo ya go bua ya setšo ebile e le go mong wa koma, o re ba tsošitšwe ke kgabo ye kgolo ya mollo bošego.

 

Le ge e le gore mollo o ile wa tingwa, palo ya batho ba šupa ba gobetše. Ba bahlano ba seemong se kaone bookelong bja Dr CN Phatudi mme wa bo tshela o išitšwe bookelong bja Letaba go hwetša hlokomelo. Mong wa koma o tšwele bookelong.

 

Baagolwa ba 18 bao ba phologilego mollo ba bolokegile mme go agilwe koma yenngwe gore ba kgone go fetša tshepedišo ya bona ya bonna.

 

Molekgotlaphethiši wa Pušo Tirišano, Bodulo le Merero ya Setšo, Basikopo Makamu gammogo le leloko la komiti ya profense ya tshepedišo ya dikoma, Kgoši Shitlhangoma Chauke ba etetše baagolwa ba ka Laboraro sepetlele go ba thekga le go ba thoba matswalo.

Molekgotlaphethiši Makamu o re ba tšhošitšwe ke mollo wo o tlogetšego baagolwa ba gobetše lefelong la koma leo le le go molaong.

 

“Re be re sa letela ditaba tša mohuta wo sehleng se sa dikoma ka morago ga ditokišo tšeo di dirilwego ke kgoro le komiti, gammogo le dikgoro tšedingwe.

 

“Se se re tlogela re sena mantšu ao a lekanego a go thoba malapa a baagolwa bao ba amegilego mmogo le mong wa koma. Re ba lakaletša gore ba fole ka pela,” a realo.

 

Makamu o re kgoro e ile go tšwela pele e šoma le kgoro ya Maphelo, ya Thuto le maphodisa gammogo le ba National Prosecuting Authority go netefatša gore sehla sa dikoma sa 2025 e ba sa katlego ka tshepedišo ya melao ya Afrika Borwa.