Meyara wa masepala wa Vhembe a ka ikhwetša a le mathateng

Ka Mogale Mohale

Meyara wa masepala wa Vhembe, Freda Nkondo a ka ikhwetša a le mathateng.

 

Se se tla ka morago ga gore komiti ya Dikgopelo (Standing Committee on Petitions) go la Lekgotlatheramolao la Limpopo le šišinye gore a pharwe ka molato ka morago ga go palelwa ke go obamela dikgopelo le ditaelo tša taletšo.

 

Se ke ka ge a paletšwe ke go fetola ditaletšo tše mmalwa gore a iponagatše pele ga komiti ye go araba dipotšišo.

 

Komiti e rometše dikgopelo le ditaelo ga raro, 1 Dibatsela 2024, 15 Dibatsela 2024 le 11 Moranang 2025 gore a iponagatše ka sebele.

 

Efela o be a romela meyara wa lebakanyana legatong la gagwe, le ge a laeditšwe gore yena le molaodi wa masepala ba swanetše go iponagatša ka sebele.

 

Leloko la komiti go tšwa mokgatlong wa Democratic Alliance, Franco Marx o re ka morago ga go hwetša pego, Seboledi sa lekgotlatheramolao Ngk Makoma Makhurupetje o ile a ikgokaganya le Meyara Nkondo go hwetša mabaka.

 

“Nakong ya dipoledišano, Nkondo o boditše Makhurupetje gore o be a sa tsebe gore go a hlokega go iponagatša pele ga komiti. Lebaka le ga le amogelege,” a realo.

 

Marx o re ba reta kgato ya komiti ya go netefatša gore bašomi ba setšhaba ba rwešwa maikarabelo. O re tšwelopele ya Nkondo ya go palelwa ke go latela melao e swanetšwe go šogwa.

 

“Re ile go netefatša gore taba ye ga e ragelwe ka thoko. Re ile go tšwela pele gore go be le maikarabelo legatong la badudi ba Limpopo,” a realo.

 

O re mošomo wa komiti ka Limpopo ga se wa kgetho. “Go swanetše go ba molaleng gore go obamela melao le ditaelo ke molao, e se go kgetho,” a realo.

 

Mmoleledi wa masepala wa Vhembe, Moses Shibambu o rile: “Meyara Nkondo o be a na le mathata a selapa a tšhoganetšo, efela o ile go iponagatša ge a ka hwetša taletšo nako yeo e tlago.”