Millione ya baswa e rometše dikgopelo tša go ithutela sephodisa
Baswa bao ba fetago millione ba rometše dikgopelo tša go ithutela go ba maphodisa.
Se se tla morago ga gore maphodisa a amogele dikgopelo tše 1 049 998 lenanegong la thuto ya maphodisa ngwageng wa 2025/2026, leo le tsebegago ka Basic Police Development Learning Programme (BPDLP).
Dikgopelo di tswaletšwe bošegong bja Labohlano, di 18 Mosegamanye.
Ka kakaretšo, go amogetšwe dikgopelo tše 595 049 go tšwa go makgarebe, mola dikgopelo tše 454 949 di tšwa go masogana.
Mmoleledi wa maphodisa, Brigadier Athlenda Mathe o re Gauteng ke profense yeo e hweditšego dikgopelo tše ntši kudu ka palo ya 267 031, ya latelwa ke KwaZulu-Natal (KZN) ka 205 802. Limpopo e na le 115 877 ya latelwa ke Eastern Cape ka 108 709 mola Mpumalanga e na le 100 516.
“Western Cape ke ya bohlano ka palo ya 86 496 ya latelwa ke Free State ka 73 214. Bao ba tšwago North West ke 66 167 mme palo ye nnyane kudu e tšwa Northern Cape ka 26 186,” a realo.
Gareng ga bao ba rometšego dikgopelo, 334 765 ba na le lengwalo la Diploma (NQF 6) le maswanedi godimo.
“Letlakala la inthanete la maphodisa le ka se sa dumelelwa go amogela dikgopelo mme re lakaletša baswa ka moka mahlatse le mahlogonolo leetong le la go tsenela tirelo ya maphodisa,” a realo.
Mathe o re ba tla ikgokaganya le bao ba nago le maswanedi ka nako ya dikgwedi tše tharo.
“Ka lebaka la palo ye kgolo ya dikgopelo tšeo di amogetšwego, bao ba se nago maswanedi ba ka se tsebišwe,” a realo.
