Monna o tšwelela pele ga Kgorotsheko ya Seshego molatong wa polao ya mosadi wa gagwe yo mmele wa gagwe o hweditšwego o thomile go bola

Monna wa mengwaga ye 33 o swerwe go la Seshego ka ntle ga Polokwane morago ga go belaelwa go bolaya mosadi wa gagwe wa mengwaga ye 26.

Mmele wa gagwe o hweditšwego o thomile go bola ka ntlong yeo ba bego ba dula mmogo go la Zone 3 ka Labobedi bošego, 12 Phato. Maphodisa a ile a bitšwa lefelong la kotsi moo ba hweditšego mmele wa mosadi yo o a na le dikgobalo tše dintši.

Mmoleledi wa maphodisa a Limpopo, Colonel Malesela Ledwaba o re dinyakišišo tša mathomo di laetša gore mosadi yo a ka ba a bolailwe matšatši a mmalwa a go feta, ka ge mmele wa gagwe o be o šetše o thomile go bola.

Ledwaba o re monna yo a belaelwago, yo a bego a dula le motšwasehlabelo o swerwe lefelong la kotsi. “O tšwelela pele ga Kgorotsheko ya Seshego ka Labohlano, 15 Phato molatong wa go bolaya mme dinyakišišo di tšwela pele,” a realo.

Mokhomišinare wa maphodisa a profense, Lieutenant-General Thembi Hadebe o kgadile tiragalo ye ka bogale ka ge e hlobaetša ebile e se na kgopolo.

“Re hlohleletša setšhaba go bega ditiragalo tša tlaišo ya bong pele di ka fetoga go ba tše bohloko go swana le tše,” gwa realo Hadebe.