Mahodu a hlasetše kliniki ya Mogoto

Kgoro ya Maphelo ka Limpopo e nyaišiša tiragalo ya bohodu bjo bo diragetšego kliniking ya Mogoto go la Zebediela, ka ntle ga Polokwane.

Tiragalo ye e diragetše mesong ya Labobedi, 26 Phato. Go ya ka Molekgotlaphethiši wa kgoro Dieketseng Mashego, batho ba ba hlano bao ba bego ba ihlamile ka dithunya ba šwahletše ka kliniking ba šomiša legora.

Mošireletši yo a bego a le mošomong o ile a tšhošetšwa ka sethunya mme a gapeletšwa go patlama fase.

“Mahodu ao a ile a nyaka sethunya sa mošireletši yoo mme ba tšwela pele go hula le go amoga baoki bao ba bego ba le mošomong dillathekeng tša bona. Ga gona yo a gobetšego,” a realo.

Bašireletši ba ile ba tsebiša bahlapetše ba go ihlama ba tšhireletšo gammogo le maphodisa bao ba gorogilego kliniking ka pela.

Molekgotlaphethiši Mashego o gateletše bohlokwa bja polokego le tšhireletšo mafelong a tša maphelo. “Ditlhaselo go bašomi ba maphelo ga di ame batho fela eupša di thibela bokgoni bja rena bja go fa setšhaba tlhokomelo ka dinako ka moka,” a realo.

O hlohleletša setšhaba go dula ba ntšhitše mahlo dinameng le go thekga bašomi ba maphelo ka dinako tše boima.