Mma o swerwe molatong wa polao ya morwa wa gagwe

Setšhaba sa Fleurhof ka Roodepoort, Gauteng se sa tšhogile ka morago ga gore mmago Jayden-Lee Meek (11) a tswarwe mabapi le polao ya gagwe.

Tiffany Meek (31) o swerwe ka Labohlano morago ga polao ya morwa wa gagwe ka kgwedi ya Motsheganong. 

Setopo sa Jayden-Lee seo se hweditšwego se na le di kgobalo tša go šiiša se hweditšwe ka la 14 Motsheganong 2025 kgauswi le legae la gagwe etšatši ka morago ga gore mmagwe a bege gore o timetše. 

Motlatšatona wa Maphodisa Ngaka Boshielo yo a bilego gona kgorong ya tsheko ya Maseterata ya Roodepoort ore SAPS e mo go šireletša ditšhaba eupša e ka se be gohle kudukudu ka magaeng le ka morago ga mejako ye e tswaletšwego.

  “Ke ka fao re ithekgilego ka setšhaba go bolela. Mohuta ofe goba ofe wa tlaišo swanetše go begwa, gomme re hlohleletša maloko a setšhaba, baagišani le maloko a lapa go šomišana 

le rena ntweng kgahlanong le GBVF,” Boshielo a realo.    

“Ge go na le pelaelo ya gore ngwana goba motho ofe goba ofe yo mongwe o a tlaišwa, hle e bege ka pela seteišeneng sa gago sa maphodisa.  Ke le hlohleletša go bega mehuta ye e fapanego ya tšhomišompe ka nako gore re emiše tahlegelo ya bophelo ye e tšwelago pele – e ka ba go tlaišwa ga ngwana mmeleng, go hlokomologwa ga bana, go hlokomologwa ga kalafo, tšhomišompe ya thobalano, tšhomišompe ya mantšu goba maikutlo – re mo go e emiša,” Boshielo o boletše.

Maphodisa a Gauteng a re a golegile Meek morago ga dinyakišišo tše di tseneletšego tša banyakišiši ba Florida le Provincial Investigative Unit. 

Molato wo o bušeditšwe morago go Labohlano la di 18 Phupu bakeng sa kgopelo ya peile ya semmušo.