Tona Ramokgopa o phatlaladitše leano la go fediša phokotšo ya mohlagase mo nakong ya dikgwedi tše 18

Tona ya Mohlagase, Ngk Kgosientsho Ramokgopa o phatlaladitše leano la bosetšhaba leo le tla thušago go fediša go fokotšwa ga mohlagase leo le amago batho ba fetago dimillione tše 1.69 mo Afrika Borwa.

Ge a be a tsebiša seo a se hlalošitšego bjalo ka leano le legolo, le le tiilego ebile le ka diregago, Ramokgopa o rile mohuta wo wa leano o tla netefatša gore ga go na setšhaba se se tla ganetšwago ditokelo tša sona tša go hwetša mohlagase.

Leano le le akaretša go beakanywa ga tšhomišo ya mohlagase malapeng ao a hlakago, gammogo le go netefatša kabo ya go hloka phokotšo ya mohlagase metse magaeng le mafelong a setoropo ao a hlabologago. Go ya ka tona, tiragatšo ye e tla phatlalatšwa go fihla le magoro a di wate.

“Re beakantše sebaka sa dikgwedi tše 18 go fediša phokotšo ya mohlagase, eupša ge setšhaba se ka šoma mmogo le rena re ka kgona go fetša mošomo wo ka dikgwedi tše 12,” a realo.

Ramokgopa o re seo ba se holofetšago, ba tla se phethagatša. “Mošomo wo o latelago o tla šogana ka theko ya mohlagase,” a realo.