Modiragatši wa go tuma dikgokaganong tša leago ebile e le mong wa lefelo la tsosološo, Appreciate Makhubele o lebagane le molato wa polao

Modiragatši wa go tuma dikgokaganong tša leago ebile e le mong wa lefelo la tsosološo, Appreciate Makhubele (30) o bošeditšwe ka kgolegong.

Se se latela morago ga go swarwa ga gagwe pelaelong ya molato wa polao ya monna wa mengwaga ye 29 yo a hlokofetšego ka morago ga go amogelwa bookelong bja Mankweng a gobetše go šoro ka Mokibelo, 12 Mosegamanye.

Makhubele o tšweletše pele ga kgoro ya tsheko ya Modjadjiskloof ka Laboraro, 23 Mosegamanye. Molato wa gagwe o šotišeditšwe ka Labone, 31 Mosegamanye gore a kgopele beile nakong ya ge dinyakišišo di tšwela pele.

Mmoleledi wa mapodisa a Limpopo, Colonel Malesela Ledwaba o re ka Laboraro, 2 Mosegamanye, mogononelwa wa mengwaga ye 30 o ile a sepela le motšwasehlabelo wa mengwaga ye 29 go tšwa lapeng la gagwe motseng wa Ga-Sekgopo a mo iša lefelong la tsosološo.

Go begwa gore motšwasehlabelo o ile a bethwa mmele ka bophara, a bušetšwa ga gabo go la Ga-Sekgopo ka Labone, 10 Mosegamanye.

“O ile a išwa bookelong bja Mankweng ka pejana, a amogelwa a le maemong a go šiiša. Ka Mošupologo, 14 Mosegamanye motšwasehlabelo yo o ile a hlokofalela bookelong mme gwa ngwadišwa molato wa dinyakišišo setišing sa maphodisa a Mankweng,” a realo.

Ledwaba o re tlhahlobo ya forensiki ya molao e dirilwe ka Labohlano, 18 Mosegamanye gomme ngaka ya tlhahlobo ya tiiša gore mohu o be a na le dikgobalo mmeleng.

“Molato wa dinyakišišo o ile wa fetošwa go wa polao ka Mošupologo, 21 Mosegamanye wa išwa maphodiseng a Modjadjiskloof go tšwetša pele dinyakišišo,” a hlalosa.

Go ile gwa thomišwa leano la go tsoma mogononelwa mme a swarwa ka Labobedi, 22 Mosegamanye moo a pharilwego ka molato wa polao. “Dinyakišišo tša maphodisa di sa tšwela pele,” a realo.