Monna wa mengwaga ye 45 o ithuntšhitše motseng wa Mabins B ka ntle ga Hoedspruit morago ga polao ya mosadi wa gagwe wa mengwaga ye 44, kgaetšedi ya gagwe ya mengwaga ye 36 le go leka go bolaya kgaetšedi ye nngwe ya mosadi wa gagwe ya mengwaga ye 34.

Tiragalo ye ya mašišapelo e diragetše ka Mokibelo wa di 18 Diphalane 2025.

Monna yo a hlaotšwego bjalo ka Pitsi Malepe yo e bego e le ngaka ya setšo, o ile a abelana seswantšho sa gagwe le mosadi wa gagwe Florah Malepe mo go Facebook ya gagwe pele ga ge a ka ipolaya.

Senepeng seo, o ile a ngwala mantšu a: “Robala ka khutšo moratiwa wa ka, se ka moka ke ka lebaka la gago le mmago.”

Mmoleledi wa maphodisa Colonel Malesela Ledwaba ore maphodisa a be a dira mediro ya go paterola ge ba hwetša tiragalo ya go thuntšhwa motseng wa Mabins B gomme ba kitimela lefelong leo. 

“Ge a fihla o ile a hwetša ngwanabo bahlaselwa yo a ilego a šupa ditopo tše pedi tše di sa phelego tša dikgaetšedi tša gagwe tšeo di nago le dintho tše dintši tša go thunywa.”

O tsebišitše maphodisa gape gore mogononelwa o fihlile lefelong la bodulo la mohlaselwa gomme a emiša sefatanaga sa gagwe ka ntle ga jarata gomme a ba thuntšhetša dithunya tše ntši go sa letelwa.

Ledwaba o okeditše ka gore nakong ya tiragalo ya go thuntšhwa, kgaetšedi ye nngwe ya mengwaga ye 34 e kgonne go kitima go nyaka polokego eupša o ile a thuntšhwa ka mpeng gomme ka morago a išwa sepetlele sa lefelong leo.

Ka morago ga tiragalo ye, go thwe mogononelwa o ithuntšhitše a bolawa ka ntlong ya gagwe. 

“Maikemišetšo a tiragalo ye ga bjale ga a tsebje gomme dinyakišišo tša maphodisa di tšwela pele,” a tlaleletša Ledwaba.