BAGONONELWA BA BAHLANO BA SWARETŠWE GO UTSWA LE GO HLABA DIKGOMO
Bagononelwa ba bahlano, go akaretša le badudi ba bane ba dinaga dišele le moAfrika Borwa o tee ba golegilwe ka Leslie, Mpumalanga ka lebaka la bohodu bja dikgomo.
Bagononelwa ba mengwaga ya magareng ga ye 18 le 30 ba swerwe morago ga gore maphodisa a hwetše tshedimošo ya gore dikgomo tše 12 di utswitšwego le go hlabja mafelong a mabedi a go fapana, ka Leslie, Mpumalanga.
Mmoleledi wa maphodisa Captain Mpho Nonyane-Mpe ore maphodisa a lemošitšwe gomme a gata mogato ka lebelo, go latela tshedimošo yeo e amogetšwego.
“Ge ba fihla go le lengwe la mafelo ao, maloko a ile a dira nyakišišo ke moka a utolla ditopo tše šupago tša dikgomo tše di hlabilwego, tšeo di akanyetšwago go boleng bjo bo ka bago R250 000,” Nonyane-Mpe o boletše.
O okeditše ka gore tshedimošo ye nngwe, yeo e filwego ka bohlale, e ile ya lebiša maloko go sefatanaga seo se belaetšago, e lego VW Amarok ye sootho yeo e nago le dinomoro tša ngwadišo tša Gauteng.
“Sefatanaga seo, seo se nago le monamedi o tee, se bonwe nakong ya go ema le go phuruphutša. Ge go hlahlobja koloi yeo, go hweditšwe nama ka gare.”
“Tshedimošo ya tlaleletšo e ile ya lebiša bahlankedi lefelong le lengwe, moo ditopo tše dingwe tše hlano (05) tša dikgomo tše di hlabilwego, go fihla go boleng bjo bo akantšwego bja go ka ba R175.000, ka gare ga kraal. Ke moka bagononelwa ba bane (04) ba ile ba swarwa lefelong la tiragalo, le ge ba bangwe ba babedi ba ile ba tšhaba, ba tlogela sefatanaga seo ba bego ba se šomiša,” a tlaleletša.
Mokhomišenare wa Mošomo wa Profense Major General (Dr) Zeph Mkhwanazi, o amogetše go swarwa ga bagononelwa gomme o gateletše bohlokwa bja go swaya leina la diruiwa go beng ba tšona ka ge di thuša go tsošološeng ga tšona gammogo le ka mabaka a dinyakišišo.
Bagononelwa ba letetšwe go tšwelela kgorong ya tsheko ya Mmaseterata ya Leslie ka Labohlano, la 17 Diphalane 2025.
